«Talyplyk» diýlende, biserhet arzuwlary, ýatlamaga iň gyzykly pursatlary, dostlugy, üýtgeşik bir mähremligi özünde jemleýän bilim mesgeniň, mugallymlaryň ýadyňa düşýär. Çünki şolar ynsana manyly ýaşamagyň ilkinji şertlerini: dogry pikirlenmegi, ula sarpa goýup, kiçini söýmegi, dost-doganlygyň mazmunyny, durmuşda öz mynasyp ornuňy tapmagy, hünär syrlaryny öwredýär.
Häzirki wagtda ýurdumyzyň ähli ýokary okuw mekdeplerinde bilim alýan ýaşlar bilen birlikde, geljekki halkaraçy hünärmenler — Türkmenistanyň Daşary işler ministrliginiň Halkara gatnaşyklary institutynyň talyplary hem önümçilik tejribelerini geçýärler. Şunda biz her ýyl öz hünärimize görä degişli ýerlere, aýratyn hem, ýurdumyzyň gazet-žurnallarynyň redaksiýalaryna, milli teleradioýaýlymlarymyza önümçilik tejribeligine ýollanýarys. Biz talyplyk ýyllarynda nazaryýetde alan bilimlerimizi tejribe arkaly has-da berkidýäris.
Talyplyk ýyllaryň halypalardan öwrenen ylym-bilimiňi berkidip, hünäriň boýunça borçlaryňy ýerine ýetirmekdir. Türkmen diplomatiýasynyň milli mekdebinde hünär öwrenip, ylym-bilim alýan ýaşlar hem geljekde daşary syýasatymyzyň ösüşlerine mynasyp goşant goşup, dünýäde ata Watanymyzyň at-abraýyny, milli diplomatiýamyzyň şöhratyny has-da dabaralandyrjak hünärmenler bolup ýetişerler. Ýokary hünär bilimine eýe bolýan ýaşlaryň ýürekleri bu gün täze taryhy döwrümize bolan çäksiz söýgüden, saýlap-seçip alan mukaddes hünärlerine bolan höwesden doly.
Gülnäzik AGAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.
