Hormatly Prezidentimiz Serdar Berdimuhamedowyň baştutanlygynda Garaşsyz Türkmenistan parahatçylyk we döredijilik ýoly bilen ynamly öňe barýar. Şu ýyl ýurdumyz üçin aýratyn şanly sene — Türkmenistanyň hemişelik Bitaraplygynyň 30 ýyllygy giňden bellenilýär. Bu hukuk derejesi BMG-niň degişli Kararnamalary bilen iki gezek tassyklanyp, Watanymyzyň halkara giňişligindäki ornuny berkidýän möhüm binýat hökmünde çykyş edýär.
Hemişelik Bitaraplyk diňe bir milli bähbitlere laýyk gelmek bilen çäklenmän, eýsem, sebitde we dünýä derejesinde parahatçylygy, durnuklylygy berkitmegiň netijeli guraly hökmünde özüni doly görkezdi. Türkmenistan oňyn Bitaraplyk ýörelgelerine esaslanýan daşary syýasaty bilen ählumumy abadançylygyň, Durnukly ösüş maksatlaryna ýetmegiň bähbidine halkara hyzmatdaşlygy üstünlikli ösdürýär.
Berkarar döwletiň täze eýýamynyň Galkynyşy döwründe Gahryman Arkadagymyzyň başyny başlan beýik işleri Arkadagly Serdarymyz üstünlikli dowam etdirýär. Häzirki wagtda ýurdumyz bilen ysnyşykly hyzmatdaşlyk etmek isleýän döwletleriň we halkara guramalaryň sany ýylsaýyn artýar. Türkmenistan dünýäniň syýasy, ykdysady we hukuk giňişligine işjeň goşulyşyp, halkara meseleleriň çözgüdine mynasyp goşant goşýar.
Türkmenistanyň öňe sürýän başlangyçlarynyň gözbaşynda oňyn Bitaraplyk ýörelgeleri durýar. Parahatçylyk, hoşniýetli goňşuçylyk, deňhukukly hyzmatdaşlyk, syýasy-diplomatik çözgütler — bularyň hemmesi BMG-niň Tertipnamasynyň esasy ýörelgeleri bilen sazlaşýar. Bu ýörelgeler häzirki zaman dünýä gurluşynyň möhüm talaby hökmünde kabul edilýär.
Şu ýyl Türkmenistanyň hemişelik Bitaraplygynyň 30 ýyllygynyň BMG-niň esaslandyrylmagynyň 80 ýyllygy bilen gabat gelmegi aýratyn many-mazmuna eýedir. Strategik hyzmatdaşlyk döwletimiziň daşary syýasatynyň ileri tutulýan ugry bolup, Türkmenistan halkara gün tertibiniň möhüm meselelerine jogapkärçilikli çemeleşýär.
Türkmen Bitaraplygy häzirki zaman şertlerine uýgunlaşýan, täze garaýyşlar bilen baýlaşdyrylýan döredijilikli hadysa hökmünde halkara derejesinde ykrar edilýär. Onuň mümkinçilikleri BMG-niň maksatlaryna ýetmäge, dünýäde parahatçylygy, abadançylygy we durnukly ösüşi pugtalandyrmaga gönükdirilýär.
Güljahan MEDJANOWA
Halkara ynsanperwer ylymlary we ösüş
uniwersitetiniň mugallymy
