Saglyk — adam üçin iň gymmatly we bahasyna ýetip bolmajak baýlykdyr. Ol ynsan ýaşaýşynyň binýady bolup, ruhy we fiziki abadançylygyň esasyny düzýär.
Sagdynlygyň we abadançylygyň ýurdy bolan eziz Watanymyz Türkmenistan döwletinde halkymyzyň saglygyny goramak, berkitmek hem-de saglygy goraýyş ulgamyny yzygiderli kämilleşdirmek boýunça giň gerimli işler alnyp barylýar. Keselleriň öňüni almak, jemgyýetde sagdyn durmuş ýörelgelerini ornaşdyrmak, temmäki önümleriniň adam saglygyna ýetirýän zyýanyny düşündirmek, sagdyn ýaşaýyş ýörelgelerini wagyz etmek ýaly çäreler “Saglyk” Döwlet maksatnamasynyň çäklerinde üstünlikli amala aşyrylýar.
Ýurdumyzyň ähli künjeginde döwrebap lukmançylyk merkezleriniň, şypahanalaryň, saglyk öýleriniň hem-de derman kärhanalarynyň gurulmagy we halkymyzyň hyzmatyna berilmegi bu ugurda alnyp barylýan işleriň aýdyň subutnamasydyr.
Bu çäreleriň ählisi raýatlaryň saglygyny üpjün etmek, olaryň bagtyýar we abadan durmuşda ýaşamagyny gazanmak ugrunda döwletimiziň edýän tagallalarynyň beýanydyr.
Leýli JUMAÝEWA
Halkara ynsanperwer ylymlary we ösüş
uniwersitetiniň talyby
