Globallaşmanyň çalt depginde ösýän häzirki döwründe diplomatiýanyň, halkara hyzmatdaşlygynyň we medeniýetara gatnaşyklaryň ähmiýeti has-da artýar. Bu gatnaşyklaryň üstünlikli alnyp barylmagynda esasy gurallar hökmünde dialog we dil çykyş edýär. Sebäbi dil diňe bir aragatnaşyk serişdesi bolman, eýsem, halklaryň arasynda düşünişmegiň, hormat goýmagyň we ynanyşmagyň binýadydyr.
Daşary ýurt dillerini öwrenmek diňe bir grammatikany ýa-da söz baýlygyny özleşdirmek bilen çäklenmän, şol diliň ulanylýan jemgyýetiniň taryhyny, medeniýetini, däp-dessurlaryny hem öwrenmegi öz içine alýar. Bu bolsa dürli halklaryň arasynda medeni köpri gurmaga, birek-biregiň gymmatlyklaryna hormat goýulmagyna we medeniýetara gatnaşyklaryň pugtalandyrylmagyna uly goşant goşýar.
Häzirki wagtda dünýäniň öňdebaryjy ýokary okuw jaýlarynyň arasynda alnyp barylýan talyp alyş-çalşygy programmalary, esasan hem daşary ýurt dilleri we halkara gatnaşyklary ugurlarynda giňden ýaýrandyr. Bu tejribeler bilimiň hilini ýokarlandyrmak bilen bir hatarda, ýaşlaryň dünýä garaýşyny giňeldýär we olary halkara giňişliginde bäsdeşlige ukyply şahslar hökmünde kemala getirýär.
Arkadagly Gahryman Serdarymyzyň öňdengörüjilikli syýasaty netijesinde, ýurdumyzyň bilim ulgamynda daşary ýurt dillerini öwretmeklige aýratyn ähmiýet berilýär. Mekdeplerde çagalar kiçi ýaşlaryndan başlap rus, iňlis, ýapon, nemes, fransuz, hytaý ýaly dilleri öwrenýärler. Bu diller bilen birlikde, degişli ýurtlaryň geografiki aýratynlyklary, medeniýeti we däp-dessurlary hem öwredilýär. Şeýlelikde, ýaş nesil diňe bir dil taýdan däl, eýsem, medeni taýdan hem baýlaşýar.
Ýurdumyzyň ýokary okuw jaýlarynda daşary ýurt dillerini hünär derejesinde öwrenmek üçin ähli şertler döredilen. Okuw programmalary halkara ülňülere laýyklykda taýýarlanylýar, daşary ýurtly mugallymlar bilen hyzmatdaşlyk ýola goýulýar, sanly bilim serişdeleri giňden ulanylýar.
Türkmenistanyň Bitaraplyk we “Açyk gapylar” syýasaty halkara gatnaşyklarynyň ähli ugurlarynda, şol sanda bilim we medeniýet ulgamynda hem hyzmatdaşlygyň ösdürilmegine giň mümkinçilikleri döredýär. Bu syýasat dürli dillerde gepleşikleriň ösdürilmegine, medeniýetleriň özara baýlaşmagyna we dünýäde parahatçylygyň berkarar bolmagyna hyzmat edýär.
Leýli JUMAÝEWA
Halkara ynsanperwer ylymlary we ösüş
uniwersitetiniň talyby
