Berkarar döwletiň täze eýýamynyň Galkynyşy döwründe Arkadagly Gahryman Serdarymyzyň ýolbaşçylygynda ýurdumyzda her bir gün toýlara, baýramlara beslenýär. Şol baýramlaryň arasynda aýratyn orun eýeleýän wakalaryň biri hem — her ýylyň oktýabr aýynyň soňky ýekşenbesinde giňden bellenilýän Türkmen alabaýynyň baýramydyr.
Bu baýramçylyk diňe bir it tohumynyň hormatyna däl, eýsem türkmen halkynyň milli mirasynyň, taryhyň, hem-de tebigat bilen ynsanyň arasyndaky asyrlarboýy wepaly gatnaşygyň dabarasydyr. Türkmen alabaýy dünýäniň iň gadymy we iň tanalan it tohumlarynyň biridir. Ene topragymyzda tapylan arheologik subutnamalar we sungat eserleri bu merdana haýwanyň halkymyzyň durmuşyndaky ornuny aýdyň görkezýär.
Çarwadarçylyk medeniýetiniň aýrylmaz bölegi bolan alabaý, çopanlaryň iň ynamdar ýoldaşy bolup, sürüleri möjeklerden gorapdyr. Ol diňe bir goragçy däl — eýesiniň syrdaşy, öýüň goraýjysy, maşgala agzasy hökmünde görülýär. Alabaýyň agraslygy, saldamlylygy, sabyrlylygy we gaýduwsyzlygy türkmen halkynyň mert häsiýetleriniň janly nusgasydyr
Türkmen alabaýynyň baýramy mynasybetli ýurdumyzda dürli çäreler geçirilýär:- «Ýylyň Türkmen edermen alabaýy» atly halkara bäsleşi, alabaýlaryň eksterýerine, beden gurluşyna, çalasynlygyna we tohum arassalygyna baha berilýän sergiler, suratkeşleriň, heýkeltaraşlaryň we şahyrlaryň arasynda döredijilik bäsleşikleri, alabaýyň taryhyna we itşynaslyga bagyşlanan ylmy maslahatlar, ýeňijilere Türkmenistanyň Prezidentiniň adyndan sylaglar gowşurylýar, bu hem baýramyň döwlet derejesindäki ähmiýetini görkezýär.
Ogulsona KULYÝEWA
Halkara ynsanperwer ylymlary we ösüş
uniwersitetiniň talyby
