Ozal habar berlişi ýaly, düýn ― 4-nji dekabrda Gazagystanyň paýtagty Astana şäherinde «Sanly giňişlik: emeli aň we maglumat manipulýasiýasy döwründe onlaýn gatnaşyk» atly III halkara mediaforum öz işini tamamlady.
Ýewropa Bileleşiginiň Gazagystandaky wekilhanasynyň hem-de Maksut Narikbaýew uniwersitetiniň, şeýle hem ÝB-niň agza döwletleri ― Fransiýa, Germaniýa we Litwa bilen hyzmatdaşlykda guralan foruma 100-den gowrak wekil gatnaşdy. Mundan başga-da, bir günlük sebitleýin çärä Merkezi Aziýanyň ähli ýurtlaryndan žurnalistler, bilermenler, raýat jemgyýetiniň wekilleri, media guramalary we žurnalistika ugrundan bilim alýan talyplar wekilçilik etdiler.
Ýewropa Bileleşiginiň Gazagystandaky ilçisi Aleska Simkiç: «Bu forum ÝB bilen Gazagystanyň hyzmatdaşlygy üçin möhüm giňişlik bolup, häzir sebitleýin platforma öwrülýär we Merkezi Aziýanyň dürli künjeklerinden media hünärmenlerini birleşdirýär. Biz bu ýerde sanly özgeriş, jogapkärli emeli intellekti we dezinformasiýa garşy göreş barada pikir alyşýarys. Bu bolsa innowasiýa, media azatlygy we durnukly maglumat gurşawyna bolan umumy ygrarlylygymyzy görkezýär. Ýewropa Bileleşigi şeýle dialogy berk goldaýar, sebäbi ol sanly özgerişiň, şol sanda emeli intellekti ulanmagyň jemgyýetçilik ynamyna esaslanýan bolmagyny üpjün etmäge kömek edýär» diýip belledi.
Forumyň ýörite myhmany, ÝB-niň Merkezi Aziýa boýunça ýörite wekili Eduards Stiprais bolsa gatnaşyjylara ýüzlenip şeýle diýdi: «Media maglumatlar jemgyýetini kemala getirmekde we demokratiýany berkitmekde möhüm rol oýnaýar. Ol raýatlaryň, şeýle hem olaryň we edaralaryň arasynda köpri bolup hyzmat edýär, açyklygy, jogapkärçiligi we maglumatyň erkin akymyny üpjün edýär. Habar serişdeleri dürli garaýyşlary hödürlemek bilen, jemgyýetleriň arasynda dialogy we düşünişmegi ösdürýär. Bu Forum Merkezi Aziýada we ondan daşarda žurnalistleriň, bilermenleriň we raýat jemgyýetiniň arasynda serhetüsti hyzmatdaşlygy güýçlendirmegi maksat edinýär. Žurnalistleriň işi raýatlaryň habardar bolmagyny üpjün etmek üçin örän möhümdir. Öz gezeginde, habardar jemgyýetler parahatçylykly we progressiw jemgyýetleriň esasydyr. Biz Merkezi Aziýada media azatlygy we sanly durnuklylyk üçin ygtybarly, uzak möhletli hyzmatdaş hökmünde siziň ýanyňyzda bolmagymyzda dowam ederis» diýdi.
Forumyň dowamynda gatnaşyjylar häzirki wagtda Astanada ýokary derejeli duşuşyklar üçin saparda bolýan Ýewropa Geňeşiniň prezidenti jenap Antonio Kostadanyň mähirli salamyny kabul etdiler. Onuň sapary Ýewropa Bileleşiginiň sanly dolandyryş, media azatlygy we maglumat bitewüligi ýaly ugurlarda Gazagystan we Merkezi Aziýa hyzmatdaşlary bilen hyzmatdaşlygy çuňlaşdyrmaga ygrarlydygyny görkezýär. Ýewropa Bileleşigi Merkezi Aziýada media professionalizmini, sanly durnuklylygy we ygtybarly maglumat giňişligini ösdürmäge ygrarlylygyny dowam etdirýär.
Şeýlelikde, üçünji sebitleýin Media forumy media hünärmenleriniň we bilermenleriniň arasynda ara alyp maslahatlaşmak, öwrenmek we hyzmatdaşlyk etmek, şeýle hem žurnalistleriň internetde bolmagy üçin emeli intellektiň täsirlerini we maglumat manipulýasiýasyna garşy jogaplary öwrenmek üçin möhüm platforma boldy.
«THE ASHGABAT TIMES».
