2026-njy ýylyň 30-njy ýanwarynda dünýä kinosynyň iň söýgüli aktrisalarynyň biri, meşhur «Öýde ýeke» (Home Alone) filminde Kewiniň ejesiniň keşbini janlandyran Ketrin O’Hara 71 ýaşynda aradan çykdy.
Aktrisanyň wekili tarapyndan berlen resmi maglumata görä, O’Hara Los-Anjelesdäki öýünde gysga wagtlyk dowam eden keselden soň aradan çykdy. Ol mart aýynda 72 ýaşyny doldurmalydy.
Ketrin O’Hara diňe bir «Öýde ýeke» däl, eýsem, dünýä kinematografiýasynyň altyn hazynasyna giren köp sanly keşpleri döretdi. Ol 1988-nji ýylda Tim Bertonyň «Bitljus» (Beetlejuice) filmindäki roly bilen ilkinji uly meşhurlygyny gazandy. 1990-njy ýyllarda «Öýde ýeke» we «Öýde ýeke 2: Nýu-Ýorkda ýitirim bolan» filmleri ony bütin dünýäde «iň meşhur eje» hökmünde tanatdy.
2010-njy ýyllarda aktrisa «Şitts Krik» (Schitt’s Creek) serialyndaky Moira Rouz keşbi bilen täze nesliň söýgüsini gazandy we bu roly üçin abraýly «Emmi» baýragyna mynasyp boldy.
Aktrisanyň aradan çykandygy baradaky habar kino dünýäsini sarsdyrdy. «Öýde ýeke» filminde onuň oglunyň roluny oýnan Makoleý Kalkin özüniň sosial mediasynda: «Eje, wagtymyz bardyr öýdýärdim… Seni gowy görýärin, soňra görüşeris» diýen täsirli sözleri paýlaşdy.
O’Hara ömrüniň soňky ýylynda hem döredijilik bilen işjeň meşgullandy. Ol geçen ýyl meşhur «Bizden biri» (The Last of Us) we «Kinostudiýa» seriallarynyň täze möwsümlerinde surata düşüpdi. Ketrin O’Hara özüniň üýtgeşik zehini, özüne çekiji gülküsi we ýatdan çykmajak keşpleri bilen kino muşdaklarynyň ýüreginde hemişelik galar.
«THE ASHGABAT TIMES».
