Sosial ulgamlarda Antarktidanyň buzluklarynyň arasynda ýeke özi barýan pingwiniň şekillendirilen pursatlary giňden ýaýrady. Bu wideo meşhur nemes režissýory Werner Hersogyň surata düşüren «Dünýäniň gyrasyndaky duşuşyklar» (Encounters at the End of the World) atly dokumental filminden alnan. Filmiň premýerasyndan takmynan 20 ýyl geçen hem bolsa, bu kadr şu günki günde internet ulanyjylarynyň ünsüni çekýär.
Film aslynda näme barada?
«Dünýäniň gyrasyndaky duşuşyklar» filmi «Discovery Channel»-yň buýurtmasy esasynda surata düşürildi. Režissýor Werner Hersog Antarktidadaky Mak-Merdo ylmy stansiýasynda ýedi hepde bolup, ol ýerdäki alymlaryň we işgärleriň durmuşy barada gürrüň berýär.
Filmde Antarktidanyň tebigaty, kyn yklym şertleri we ol ýerde işleýän adamlaryň gündelik durmuşy görkezilýär. Hersog tebigaty romantik görnüşde däl-de, bolşy ýaly: sowuk, asuda we käwagt gorkunç ýagdaýda teswirleýär. Mak-Merdo stansiýasy Ross adasynda ýerleşýän bolup, ol ýerde bir wagtyň özünde müňden gowrak adam ýaşap we işläp bilýär.
Film 2009-njy ýylda «Oskar» baýragyna dalaşgär boldy, emma Jeýms Marşyň fransuz darbazçysy Filipp Peti baradaky filmine ýeňildi. IMDb saýtynda oňa 7,7 ball berildi, «Rotten Tomatoes» platformasynda hem tankytçylar tarapyndan ýokary baha berildi.
Bu ýerdäki «pingwin kadry» internetde gaty meşhurdyr, sebäbi ol pingwin öz toparyndan aýrylyp, hiç hili umyt bolmadyk tarapa — yzyna dönmez ýol bilen daglara tarap gidýär. Bu, köplenç, adamyň öz pelsepesine we durmuş ýoluna meňzedilýär.
Pingwin sahnasynda nämeler görkezilýär?
Filmde ekolog Dewid Eýnli bilen geçirilen söhbetdeşlik wagtynda Hersog pingwinleriň özüni alyp barşy barada sorag berýär. Alymyň aýtmagyna görä, käbir ýagdaýlarda pingwinler ugruny ýitirip, azaşýarlar we netijede okean tarapa däl-de, buzluklar we daglar tarapa ýöräp gidýärler.
Filmde edil şonuň ýaly bir pingwin görkezilýär: ol öz toparyndan aýrylyp, ýeke özi yzyna gaýtmak mümkin bolmadyk tarapa tarap ädim ädýär. Alymlaryň bellemegine görä, beýle pingwini yzyna gaýtarmaga synanyşmak hem peýda bermeýär — ol ýene şol ugra tarap ýoluny dowam etdiriberýär.
Näme üçin bu kadr meşhur boldy?
Şu günki günde sosial ulgam ulanyjylary bu pingwini dürli ýagdaýlara meňzedýärler. Kimdir biri ony jemgyýetden çetleşmegiň alamaty diýip bilse, başgalary ony garaşsyz karar kabul etmegiň beýany hökmünde kabul edýärler.
Internet ulanyjylary bu sahna esasynda emeli aňdan peýdalanyp, adaty bolmadyk wideolar taýýarlaýarlar we olary dürli aýdymlar hem-de teswirler bilen paýlaşýarlar. Käbir postlarda pingwin «öz ýoluny saýlan» gahryman hökmünde görkezilýär. Meselem, käbir wideolarda «Pingwin, bol!» diýen ýazgy hem peýda bolýar we roligiň düşündirişinde: «Uçmaga ukypsyz bir guşuň karary tutuş bir nesle ylham berdi» diýip bellenilýär. Ulanyjylar olar arkaly başgalary gorkudan el çekip, öz saýlan ýoluňdan gorkmazlyga çagyrýarlar.
Bu tekstden görnüşi ýaly, Werner Hersogyň filmi diňe bir ylmy däl, eýsem, adamzat psihologiýasyna hem degişli çuňňur manylary özünde jemleýär. «Pingwin bolmak» — köpçüligiň yzyndan däl-de, öz içki duýgularyňa we maksadyňa tarap gitmegi aňladýan simwola öwrülipdir.
Şeýlelikde, filosofiki taýdan seretseň, daga barýan pingwin bar bolan düzgünleri we adaty ýaşaýyş ugruny (okeany) taşlap, ölüme barýandygyny bilse-de, öz saýlan ugruna (daglara) tarap gidýär. Adamlar munda özlerini görýärler — köpçülige meňzemezlik, öz ýoluňy saýlamak we bilinmeýän geljege tarap gorkusyz ädim ätmek.
«THE ASHGABAT TIMES».
