2024-nji ýylyň 22-nji oktýabrynda Aşgabatda, “Arçabil” myhmanhanasynda Weterinariýa boýunça Hökümetara Geňeşiniň 46-njy maslahaty geçirildi. Maslahata Geňeşiň agzalary we Belarus Respublikasy, Gazagystan Respublikasy, Gyrgyz Respublikasy, Russiýa Federasiýasy, Täjigistan Respublikasy, Türkmenistan, Özbegistan Respublikasy, esasy guramalar, şeýle hem GDA-nyň Ýerine ýetiriji komitetiniň wekili gatnaşdylar.
Çäräni Türkmenistanyň Oba hojalyk ministri Çetiew Çaryýar açdy we gutlag sözi bilen çykyş etdi.
Weterinariýa boýunça Hökümetara Geňeşiniň başlygy wezipesine Türkmenistanyň Oba hojalyk ministrliginiň Döwlet weterinariýa gullugynyň başlygy Nuryýew Dowlet saýlanyldy.
Geňeşiň maslahatynyň gün tertibine GDA agza döwletlerde epizootik abadançylygy üpjün etmek bilen baglanyşykly meseleleriň giň toplumy girýär.
Delegasiýalaryň ýolbaşçylary GDA agza döwletlerde epizootik ýagdaý barada maglumat berdiler.
Geňeşiň agzalary GDA agza döwletleriň haýwan keselleriniň öňüni almak we olara garşy göreşmek boýunça bilelikdäki çäreler toplumynyň durmuşa geçirilmegi barada maglumatlary ara alyp maslahatlaşdylar. Bu çäreler 2025-nji ýyla çenli dowam eder we GDA agza döwletleriň haýwan kesellerini anyklamak we gözegçilik etmek boýunça hünärmenleri taýýarlamak we gaýtadan taýýarlamak boýunça esasy gurama bolan “Federal haýwan saglygyny goramak merkezi” (Russiýa Federasiýasy) tarapyndan taýýarlanyldy. Şeýle hem, 2030-njy ýyla çenli haýwanlaryň we guşlaryň aýratyn howply keselleriniň öňüni almak we olara garşy göreşmek boýunça bilelikdäki çäreler toplumynyň taslamalary ara alnyp maslahatlaşyldy.
Geňeşiň agzalary GDA agza döwletleriň weterinariýa üçin genetiki materialyň we derman serişdeleriniň hiline gözegçilik etmek boýunça hyzmatdaşlygyny ösdürmegiň zerurlygy baradaky teklibi goldadylar we “Wserossiýskiý döwlet haýwanlar we iýmler üçin derman serişdeleriniň hiline we standartlaşdyrylmagyna gözegçilik merkezi” federal döwlet býujet edarasy statusyny GDA agza döwletleriň genetiki materialyň, weterinariýa üçin derman serişdeleriniň we haýwanlardan alynýan azyk çig mallarynyň hiline gözegçilik etmek boýunça hünärmenleri taýýarlamak we gaýtadan taýýarlamak boýunça esasy gurama hökmünde kabul etmek kararyna geldiler.
Maslahatyň netijeleri boýunça Geňeşiň agzalary GDA giňişliginde azyk howpsuzlygyny üpjün etmäge uly goşant goşjak çözgütleri kabul ederler.
Weterinariýa boýunça Hökümetara Geňeşiniň indiki maslahaty 2025-nji ýylyň ikinji ýarymynda Täjigistan Respublikasynda göni görnüşde geçirilmegi meýilleşdirilýär
