Ýaňy-ýakynda 7-11-nji noýabr aralygynda Polşa Respublikasynyň Katowiçe şäherinde geçirilen halkara matematika bäsleşiginde türkmen talyplary üstünlikli çykyş etdiler. Bu bäsleşige Polşanyň, Rumyniýanyň, Gresiýanyň, Awstriýanyň, Özbegistanyň talyplaryndan düzülen 26 topardan ybarat bolan 121 talyp gatnaşdy. Talyp ýaşlaryň gatnaşan bu olympiadasy iki günläp dowam edip, birinji gününde bakalawr hem-de magistr derejeleri boýunça şahsy bäsleşik geçirildi. Ýaryşyň ýeňijileriniň sanawnamasynda Türkmenistanyň Döwlet energetika institutynyň adynyň ýazylmagy bizi diýseň begendirýär. Institutymyzdan Annaýew Muhammet baýrakly 2-nji oruna we kümüş medala, Turaýew Baýram hem-de Goçyýew Nurmuhammet baýrakly 3-nji oruna we bürünç medala mynasyp boldular, ýaryşyň ikinji gününde toparlaýyn bäsleşik geçirilip, talyplarymyz bu görnüşde bürünç medalyň eýeleri boldular. Sözümiziň ahyrynda diňe bir öz talyplarymyzy däl, bu bäsleşikde ýokary netije görkezmegi başaran beýleki Türkmenistanly talyplarymyzy hem gazanan üstünlikleri bilen tüýs ýüregimizden gutlaýarys. Ýurdumyzda ylymly bilimli ýaşlary ýetişdirmekde giň mümkinçilikleri döredip berýän Hormatly Prezidentimiziň başy dik, jany sag, il ýurt bähbitli beýik tutumlary hemişe rowaçlyklara ýar bolsun.
Şageldi HUDAÝBERDIÝEW
Türkmenistanyň Döwlet energetika
institutynyň mugallymy
