Berkarar döwletiň Täze eýýamynyň Galkynyşy döwründe Watanymyzyň bilim ulgamy dünýäniň ösen döwletleriniň hatarynda kämilleşýär. Türkmen halkynyň medeni mirasyny düýpli öwrenip, halka ýetirmek we dünýä wagyz etmek barada döwlet derejesinde uly işler alnyp barylýar. Türkmen halkynyň beýik şahyry Magtymguly Pyragynyň ömri we döredijiliginiň giňden öwrenilmegi alnyp barylýan işleriň aýdyň mysalydyr.
Magtymgulynyň diňe bir halkyň, milletiň däl-de, tutuş adamzadyň manyly hem parahat ýaşaýşynyň kepili bolan dostluk, doganlyk, ula hormat, kiçä söýgi, Watany, ene topragy, milletiňi janyňdan ileri tutmak ýaly ahlak gözelliklerinden söz açýan şygyrlarynyň tematik özboluşlylygyda makalalaryň birnäçesinde öz beýanyny tapypdyr.
Şahyryň 300 ýyllyk toýy mynasybetli onuň öwrenilişi bilen baglanyşykly dürli işler alnyp barylýar. Şahyryň edebi mirasy täzeden halka ýetirilmek bilen birlikde, şol mirasyň pelsepe hem dünýägaraýyş esaslary dogrusynda birnäçe ylmy, edebi işler taýýarlanyldy, ençe ýola döwlet hem halkara derejesinde ylmy–amaly maslahatlar geçirilýär.
Beýik Magtymgulynyň dünýäniň durkuny hasyl edýän düýpli zatlary, dünýäniň barlygynyň we ösüşiniň ählumumy kanunalaýyklyklaryny çuňňur beýan edýän şygyrlaryndaky filosofik garaýyşlary bütin adamzada bitewiligi ündeýär. Gahryman Arkadagymyz we Hormatly Prezidentimiz şol bitewilikden ugur alýan syýasaty ýöretmek bilen, biziň Berkarar döwletimiziň diňe bir öz halkymyzyň däl, eýsem, dünýä jemgyýetçiliginiň, tutuş ynsanyýetiň rowaç ýaşamagyna gönükdirilen tutumly işlerine mynasyp goşant goşýan döwlet bolmagyny üpjün edýär.
Şanly sene mynasybetli ýurdumyzyň ylmy-barlag edaralarynda, ýokary okuw mekdeplerinde ylmy maslahatlaryň, kitap sergileriniň, beýleki okuw mekdeplerinde döredijilik bäsleşikleriniň, şahyrana okaýyşlaryň, edebi duşuşyklaryň we sapaklaryň, görkezme-açyk sapaklaryň guralýandygy beýik akyldaryň ömür-döredijiliginiň ýedi ýaşdan ýetmiş ýaşa çenli hemmeleri gyzyklandyrýandygynyň subutnamasydyr.
Berkarar döwletiň Täze eýýamynyň Galkynyşy döwründe Magtymgulynyň döredijiligini öwrenmek, onuň eserlerini dünýä dillerine terjime etmek täze belentliklere göterilýär. Munuň şeýledigine köpçülikleýin habar beriş serişdeleri bilen yzygiderli tanyş bolanyňda hem göz ýetirmek bolýar. Häzirki wagtda Magtymguly Pyragynyň goşgularyna dünýäniň örän köp ýurtlarynda uly isleg bildirýärler, onuň goşgularyny öwrenýärler.
Şöhrat ŞYHYNÝAZOW
Türkmen döwlet binagärlik-gurluşyk
institutynyň talyby
