Berkarar döwletiň täze eýýamynyň Galkynyşy döwründe Hormatly Prezidentimiz halkyň sarp edýän harytlarynyň önümçiliginiň netijeliligini ýokarlandyrmagyň esasy şertleriniň biri bolan önümleriň hilini ýokarlandyrmaklyga uly üns berýär.
Biziň ýurdumyzyň azyk senagatynda iýmit ýaglarynyň öndürilişiniň özboluşly aýratynlyklary bolýar. Ösümlik ýaglary, margarin ýag pudagynyň kärhanalarynda, mal ýaglary bolsa et pudagynyň kärhanalarynda öndürilýär.
Oba hojalygyň ösüşiniň durnuklylygyny gazanmazdan, ýurduň galla howpsuzlygyny gazanyp bolmaz. Azyk önümleriniň bolçulygyny döretmek, şeýle hem Berkarar döwletiň täze eýýamynyň Galkynyşy döwründe gadam basan ilatyň ýaşaýyş-durmuş goraglylygyny üpjün etmek bu pudagyň baş wezipesi bolup durýar.
Azyk senagaty pudagynyň ägirt uly mümkinçiliklerini, kuwwatyny ulanmak bilen ýerli çig malyň gaýtadan işlenilmegine esaslanyp, önümçilige dünýä ülňüleriniň talaplaryna laýyk gelýän döwrebap tehnologiýalary ornaşdyrmak arkaly öndürilýän önümleriň möçberini artdyrmak, görnüşlerini giňeltmek, olaryň hilini, bäsdeşlik ukybyny ýokarlandyrmak, pudagyň netijeliliginiň, düşewüntliliginiň derejesini galdyrmak, töleg ukybyny berkitmek, maliýe taýdan durnuklylygyny pugtalandyrmak Türkmenistanyň azyk senagat Döwlet birleşigini ösdürmekde ileri tutulýan ugurlardyr.
Pudagyň ýokary depginler bilen ösdürilmegi diňe ýurdumyzyň içerki talaplaryny kanagatlandyrmaga däl, eýsem, ösümlik ýagy, sabyn, salomas ýaly önümleriň aýry-aýry görnüşlerini eksport etmägede mümkinçilik berýär. Täze tehnologiýalary işläp taýýarlamak we önümçilige ornaşdyrmak, önümleriň Türkmenistanda ozal öndürilmedik görnüşlerini, şol sanda ýerli çig maly peýdalanmak arkaly ýokary tehnologiýaly häzirki zaman gurallary bilen öndürmegi özleşdirmek pudagy mundan beýläk-de ösdürmegiň möhüm ugrudyr.
Laçyn ATAMYRADOWA
S.A.Nyýazow adyndaky Türkmen oba hojalyk
uniwersitetiniň talyby
