Aşgabadyň 26-njy noýabrda III türkmen-hytaý forumy “Innowasiýalar, täze tehnologiýalar we olaryň önümçilige ornaşdyrylmagy meseleleri” başlandy. Çäräniň maksady – toplanan tejribäni alyşmak, ykdysadyýetiň öňdebaryjy pudaklarynda innowasion çözgütleriň ornaşdyrylmagyny ara alyp maslahatlaşmak, şeýle hem ýurtlaryň arasynda ylmy-tehniki hyzmatdaşlygy işjeňleşdirmek.
Gatnaşyjylar dürli ugurlarda alymlaryň arasyndaky netijeli hyzmatdaşlygyň geljegini ara alyp maslahatlaşdylar. Olar Türkmenistanda we Hytaýda geçirilýän gözleg işlerine, bäsdeşlige ukyply, ekologiýa taýdan howpsuz we ykdysady taýdan netijeli ýokary tehnologiýalaryň döredilmegi meselelerine aýratyn üns berdiler.
Forumyň çäginde innowasion tehnologiýalar sergisi hem geçirildi. Daşary ýurtly myhmanlar häzirki zaman Türkmenistanyň ösüş derejesi bilen tanyşdylar, ylmy-bilim ulgamynyň hemmetaraplaýyn kämilleşdirilmegine aýratyn üns berdiler.
