Aşgabatda 27-nji noýabrda durnukly ulag boýunça Dostlar toparynyň ikinji ministrler duşuşygy geçirildi. Çäre “Halkara ulag-tranzit geçelgeleri: arabaglanyşyk we ösüş – 2024” konferensiýasynyň çäklerinde geçirildi.
Duşuşyga gatnaşyjylar durnukly ulag ulgamlaryny global we sebit derejelerinde ösdürmegiň mümkinçiliklerini ara alyp maslahatlaşdylar, şeýle hem 2026-2035-nji ýyllar üçin BMG-niň durnukly ulag boýunça Onýyllygyna taýýarlyk görmekde tagallalary birleşdirmegiň zerurdygyny nygtadylar.
Taraplar bu düzümiň işini mundan beýläk-de kämilleşdirmegiň we ulag-logistika ulgamyndaky kynçylyklary ýeňip geçmek boýunça tagallalary birleşdirmegiň zerurdygyny, şol sanda bu pudakdaky sebit we global päsgelçilikleri azaltmagyň usullaryny, BMG agza döwletleriniň ulag ösüşi boýunça başlangyçlaryny öňe sürmegiň zerurdygyny bellediler.
Mundan başga-da, gatnaşyjylar durnukly ulag boýunça Dostlar toparyna goşulmak isleýän täze agza döwletleri kabul etmek meselesini ara alyp maslahatlaşdylar. Duşuşygyň netijesinde taraplar Jemleýji Jarnamany kabul etdiler.
