Türkmenistanyň Prezidenti Serdar Berdimuhamedow 25-nji dekabrda Moskwada Täze ýyl baýramçylygynyň öňüsyrasynda däp boýunça geçirilýän Garaşsyz Döwletleriň Arkalaşygynyň agza döwletleriniň baştutanlarynyň resmi däl sammitine gatnaşdy. Duşuşyk “Igora” gyş sport oýunlary toplumynyň Buz köşgünde geçirildi.
Taraplar GDA-nyň şu ýylky işiniň netijelerini seljerdiler, hyzmatdaşlygyň ileri tutulýan ugurlaryny we geljek döwür üçin wezipeleri kesgitlediler. Şeýle hem gatnaşyjylar ykdysady hyzmatdaşlygyň oňyn görkezijilerini kanagatlanma bilen bellediler. Döwlet baştutanlary sebitleýin we global gün tertibiniň möhüm meselelerini hem ara alyp maslahatlaşdylar.
Mundan başga-da, Russiýanyň Prezidenti Wladimir Putin GDA-nyň kärdeşlerini 2025-nji ýylda Moskwada Beýik Watançylyk urşunda Ýeňşiň 80 ýyllygy mynasybetli geçiriljek dabaralara gatnaşmaga çagyrdy. Russiýanyň ýolbaşçysy agyr harby ýyllarda sowet halklarynyň frontda we tylda gahrymançylyk we edermenlik görkezenligini, bu öçmejek gahrymançylygyň Arkalaşygyň ýurtlarynda mukaddes hormatlanýandygyny nygtady.
