Mataljygym man eken.
Dyrnajygy on eken.
Dilewar-a, dilewar,
Dil üstüniň meňi bar. (Gapan)
Men barýardym hol baýak,
Elimde ýylgyn taýak.
Bir ajaýyp zat gördüm,
Bir kellede müň gulak. (Ýüň darak)
Meniň jigim garaja,
Garaja donly töreje.
Geliň, görüň ojakda,
Her dürlüje saçakda. (Gazan we nahar)
Öýümde bir saky bar,
Durar ojak başynda.
Geregiňi alarsyň,
Oturyp onuň gaşynda. (Saçak)
Pessejik ýerden gün dogar. (Çyra)
Seretdigiň ýüzüne,
Surat düşer gözüňe. (Aýna)
Şeýtanyň şerinde,
Adamyň elinde,
Alty aýagy bar,
Guýrugy bilinde. (Terezi)
Çynar NURMÄMMEDOWA
S.A. Nyýazow adyndaky
Türkmen oba hojalyk
uniwersitetiniň talyby
