Hormatly Prezidentimiz Berkarar döwletiň Täze eýýamynyň galkynyşy döwründe ýurdumyzda azyk bolçulygyny döretmekde balykçylyk hojalygyny ösdürmäge uly üns berýär. Ýurdumyzyň ykdysady ösüşinde içki we daşky suwlarda balyk tutmagyň we ony gaýtadan işlemegiň binýady kämilleşdirilýär. Tebigy suw ýataklarynda balykçylygy ösdürmekde, balykçylyk meliorasiýa işlerini geçirmek, balyklaryň promysel ähmiýetli görnüşlerini goýbermek, şol sanda olary ýerli şertlere öwrenişdirmek (akklimatizasiýa) bu ulgamyň sazlaşykly ösüşini üpjün edýär.
Milli Liderimiziň, Türkmenistanyň Halk Maslahatynyň başlygy Gahryman Arkadagymyzyň taýsyz tagallasy bilen Garagumuň jümmüşinde “Altyn asyr” Türkmen kölüniň gurulmagy balykçylygyň ýaýbaňlanmagyna amatly mümkinçilikleri döretdi. Ol barada Gahryman Arkadagymyz Türkmen kölüniň açylyş dabarasynda: “Bu baş şor suw akabasynyň ugrunda dürli göwrümli çöketlikler örän köp. Suwuň gelmegi bilen şol çöketliklerde owadan hem-de täsin kölleriň ençemesi peýda bolup, olaryň töwereginde häzirki zaman balyk hojalyklarynyň ýüzlerçesi dörediler” diýip belledi.
Ýurdumyzyň ilatyny balyk we balyk önümleri bilen doly üpjün etmekde maýa goýum serişdeleri Hazar deňzinde balyk tutmagyň möçberini köpeltmäge we howdan balykçylygyny ösdürmäge gönükdirilendir. Balyk hojalygynyň köptaraplaýyn ösdürilmegini çaltlandyrmak we önümçiligi güýçlendirmek, täze, ýokary netijeli tehnologiýalary önümçilige ornaşdyrmak, bazary ýokary hilli, häzirki döwrüň talaplaryna laýyk balyk önümleri bilen üpjün etmek, balykçylyk pudagynyň esasy wezipesidir.
Annatäç TAGANOWA
S.A.Nyýazow adyndaky
Türkmen Oba Hojalyk
Uniwersitetiniň talyby
