Golaýda Türkmenistanyň Döwlet energetika institutynyň gurnamagynda Nazary mehanika dersi boýunça talyplaryň 3nji halkara açyk internet olimpiadasy üstünlikli geçirildi. Bu bäsleşige 16 ýurduň 87 sany ýokary okuw mekdeplerinden 650 – den gowrak talyplar gatnaşdy. Bäsleşik iki tapgyrda şahsy hem-de toparlaýyn görnüşde geçirildi.
Şahsy bäsleşige 650-ä golaý talyp gatnaşyp, iň ýokary netijäni Moskwanyň fiziki tehniki institutynyň talyplary görkezdi. Olar toparlaýyn bäsleşikde hem sanawyň başyny çekdiler. Gatnaşyjylaryň sany boýunça birinjiligi eýelän (226 sany talyp) Hytaý halk respublikasynyň talyplary umumy orunlaryň sany boýunça hem birinjiligi öz adyna ýazdyrdy. Türkmenistanly talyplar bu bäsleşikde umumy gazanylan orunlaryň sany boýunça hytaýly talyplardan soň ikinji orny eýeledi.
Şahsy hem-de toparlaýyn bäsleşikde Oguzhan adyndaky Türkmenistanyň inžener tehnologiýalar uniwersitetiniň, Türkmenistanyň Döwlet energetika institutynyň we Magtymguly adyndaky Türkmen döwlet uniwersitetiniň talyplary gowy netijeleri görkezdi.
Ýeri gelende bellesek, bu bäsleşige şu ýyl dünýäniň iň gowy ýokary okuw mekdepleriniň sanawynda ilkinji ýüzlüge girmegi başaran abraýly ýokary okuw mekdepler gatnaşdy. Türkmenistanly talyplaryň olar bilen deň netije görkezmegi bolsa diýseň guwandyryjy wakadyr.
Sanjar AKMYRADOW
Türkmenistanyň Döwlet
energetika institutynyň talyby
