Synag taslamasy 2024-nji ýylyň 1-nji maýynda başlanar we bir ýyllap dowam eder

Russiýa Federasiýasynyň Ulag ministrligi 1-nji maýdan ähli ulag görnüşleri bilen ýük daşamak üçin elektron resminama dolanyşygyna geçmek boýunça bir ýyllyk synag geçirmegi teklip edýär. Munuň kadalaşdyryjy hukuk namalarynyň taslamasynyň federal portalynda neşir edilen hökümet kararlarynyň taslamasyndan gelip çykýandygyny bellemek gerek. «2024-nji ýylyň 1-nji maýyndan 2025-nji ýylyň 1-nji maýyna çenli aralykda ýol, deňiz, derýa, demir ýol we howa ulaglary arkaly ýük daşamakda elektron resminama dolanşygyna geçmek boýunça synag geçirmeli» diýlip, resminamanyň taslamasynda aýdylýar. Synagyň esasy maksady birinji tapgyrdaky Milli sanly ulag-logistika platformasynyň hyzmatlaryny we kiçi ulgamlaryň ilkinji nobatdaky prototiplerini barlamakdan ybaratdyr. Synagyň geçirilmegini üpjün etmäge ygtyýarly federal ýerine ýetiriji gurama hökmünde Russiýa Federasiýasynyň Ulag ministrligi bellendi. Synaga Russiýanyň demir ýollary, Ulag ministrligi, Içeri işler ministrligi, Uzak Gündogaryň we Arktikanyň ösüşini utgaşdyrmak boýunça ministrlik, Ykdysadyýet ministrligi, Federal gümrük gullugy, Federal salgyt gullugy, Federal howpsuzlyk gullugy, Weterinariýa we fitosanitar gözegçilik federal gullugy, Sarp edijileriň hukuklaryny goramak we adam abadançylygyna gözegçilik etmek boýunça federal hyzmat gullugy hem-de Russiýanyň eksport merkezi gatnaşar.