Häzirki günlerde ýurdumyzyň woleýbol boýunça milli ýygyndysy Päkistanyň paýtagty Islamabadda milletler ligasynda çykyş edýär.
Bu ýaryşa Türkmenistanyň, Eýran Yslam Respublikasynyň, Päkistanyň, Owganystan Yslam Respublikasynyň, Gyrgyzystanyň we Şri Lankanyň ýygyndy toparlary gatnaşýar. Ýaryş bir toparda aýlaw görnüşinde geçirilýär. Şunlukda toparda iň gowy netije görkezen iki ýygyndy final oýnuny oýnar. Toparda 3-nji we 4-nji orunlary alan ýygyndylar bürünç medalyň ugrunda güýç synanşarlar.
3 oýnuň netijeleri boýunça Türkmenistanyň ýygyndysy häzirlikçe 4 utuk bilen 4-nji orunda barýar. 2-nji we 3-nji orunlarda barýan Gyrgyzystanyň we Eýranyň ýygyndy toparlary bary ýogy 1 utuk ara tapawut bilen öňde barýar. Milli ýygyndymyz galan iki oýnuny 5-nji hem-de 6-njy orunlarda barýan Şri-Lankanyň we Owganystanyň ýygyndysy bilen geçirer.
Ýaryşyň geçen ýylky finalçylary bolan Gyrgyzystanyň toparyny 3-0 hasabynda ýeňen ildeşlerimiz, geçen möwsümiň çempiony Eýranyň ýygyndysyndan 2-3 hasabynda asgyn geldi.
17-nji maýda bürünç medalyň we çempionlygyň ugrundaky oýunlardan soň, ýaryşyň ýeňijileri doly belli bolar.
Biz hem ildeşlerimize indiki oýunlarynda uly üstünlikleri arzuw edýäris.
Gudrat AKYÝEW
Türkmenistanyň Döwlet
energetika institutynyň talyby
