Türkmen paýtagtynda Türki medeniýetiň halkara guramasyna (TÜRKSOÝ) agza ýurtlaryň II teatr festiwaly geçiriler. Bu barada Türkmenistanyň resmi metbugaty 14-nji iýunda habar berdi.
Ministrler Kabinetiniň başlygynyň orunbasary M. Mämmedowa Türkmenistanyň Ministrler Kabinetiniň mejlisinde teatr festiwalynyň geçirilmegi bilen baglanyşykly guramaçylyk meseleleri barada hasabat berdi.
Bu döredijilik çäresini Türkmenistanyň Prezidentiniň degişli Kararlaryna laýyklykda, şu ýylyň oktýabr aýynda meýilleşdirilýär. Oňa Azerbaýjandan, Gazagystandan, Gyrgyzystandan, Türkiýeden we Özbegistandan teatr toparlarynyň gatnaşmagyna garaşylýar. Şeýle -de TÜRKSOÝ-na agza ýurtlaryň döwlet teatrlarynyň ýolbaşçylarynyň geňeşiniň nobatdaky mejlisini geçirmek meýilleşdirilýär.
Döwlet Baştutanymyz hasabaty diňläp, Änew şäheriniň 2024-nji ýylda «Türki dünýäsiniň medeni paýtagty» diýlip yglan edilmegi mynasybetli birnäçe dabaralara we çärelere badalga berlendigini belledi hem-de şu ýylyň oktýabrynda Aşgabat şäherinde Türki medeniýetiň halkara guramasyna (TÜRKSOÝ) agza ýurtlaryň II teatr festiwalyny ýokary derejede geçirmäge taýýarlyk görmegi tabşyrdy.
