2024-nji ýylyň 29-njy iýun agşamy «Arkadag Binasy» baýramçylyk meýdançasynda ýurduň sungat ussatlarynyň çykyşlary boldy.
Bu ýerde guralan dabaranda edebi maksatnamasyna aýdymlar we joşgunly tanslar, artistleriň döredijilik toparlarynyň ýerine ýetiren çykyşlary, milli sungatyň özboluşly öwüşginini açyp görkezýän döredijilik çykyşlary boldy.
Tomaşaçylar Türkiýe Respublikasynyň sungat ussatlary Mustafa Sandalyň we Mustafa Jejeliniň çykyşlaryny uly şowhun bilen garşyladylar. Olar meşhur estrada we halk aýdymlaryny ýerine ýetirdiler.
Ýeri gelende bellesek, agzalan türk ýyldyzlary mundan ozal hem Türkmenistana gelipdiler. Has anygy, Mustafa Jejeli 2013-nji ýylda, Mustafa Sandal bolsa 2022-nji ýylda Aşgabatda konsert beripdi.
Ýurdumyzda asylly däbe öwrülen her bir baýramçylykda dünýä meşhur küştdepdi aýdymly tans dessury ýerine ýetirildi. Häzirki wagtda halkymyzyň medeni mirasynyň ajaýyp nusgasy bolan gadymy aýdymly tans dessury ÝUNESKO-nyň Adamzadyň maddy däl medeni mirasynyň sanawyna girizilip, döwrüň ruhy bilen sazlaşýar we many-mazmun taýdan baýlaşýar. Küştdepdini birleşen folklor toparlary ýerine ýetirip, öz ussatlyklaryny görkezdiler.
Sözi hem sazy türkmen halkynyň Milli Lideri, Gahryman Arkadagymyza degişli bolan «Öňe, öňe, diňe öňe, jan Watanym, Türkmenistan!» atly aýdym baýramçylyk konsertiniň jemlenmesine öwrüldi. Ony dabara gatnaşyjylaryň bilelikde ýerine ýetirmekleri sungat eseriniň täsirliligini artdyrdy. Bu aýdym watansöýüjiligiň, agzybir halkymyza we Garaşsyz, hemişelik Bitarap Watanymyza beýik buýsanjyň senasy bolup ýaňlandy.
