2024-nji ýylyň 24-nji iýunynda Gazagystanyň Astana şäherinde Türkmenistanyň Medeniýet günleri başlandy. Bu barada Türkmenistanyň Gazagystandaky Ilçihanasyny habar berýär.
Açylyş dabarasynda Magtymguly Pyragynyň «At istärin» diýen eserine esaslanýan «Istärin» çeper filminiň görkezilişi boldy. Ýeri gelende belläp geçsek, film Arslan Eýeberdiýewiň režissýorlyk etmeginde düşürildi.
Medeniýet günleriniň açylyş dabarasyna iki ýurduň döwlet edaralarynyň wekilleri, döredijilik, jemgyýetçilik we ylmy wekilleri gatnaşdy.
Gazagystan Respublikasynyň medeniýet we maglumat ministriniň orunbasary Erbol Alikulow öz çykyşynda Magtymguly Pyragynyň döredijiliginiň ähmiýetine ünsi çekdi we beýik akyldaryň ruhy mirasynyň tutuş türk dünýäsiniň dostlugyny hem parahatçylygyny alamatlandyrýandygyny belledi.
2024-nji ýylyň 25-nji iýunynda Gazagystanyň Milli akademiki kitaphanasynda «Magtymguly» atly ýygyndynyň tanyşdyrylyş dabarasy bolar. Şeýle hem, günüň dowamynda Kalibek Kuanyşbaýew adyndaky Gazagystanyň milli aýdym-saz we drama teatrynda Türkmenistanyň halk amaly-haşam sungatlarynyň we muzeý gymmatlyklarynyň sergisi hem-de gala-konserti guralar.
Mundan daşary, 2024-nji ýylyň 25-nji iýunynda Hekim Alowowyň režisýorlyk etmeginde düşürilen «Gyzyl alma» çeper filminiň, «Dana» atly monospektaklyň we türkmen milli geýimleriniň görkezilişi bolar.
2024-nji ýylyň 27-nji iýunynda geçiriljek çäreler iki ýurduň ussatlarynyň gatnaşmagynda gala-konserti bilen tamamlanar. Medeniýet günleriniň geçirilmegi Gazagystanyň halky üçin Türkmenistanyň baý medeni mirasy bilen tanyşmaga döredilen ajaýyp mümkinçilikdir.
