2024-nji ýylyň 11-nji iýunynda «Türkmendeňizderýaýollary» agentliginiň edara binasynda agentligiň ýolbaşçylarynyň hem-de Hindistanyň Türkmenistandaky Ilçisi Madhumita Hazarika Bhagatynyň arasynda duşuşyk geçirildi. Duşuşykda ilçi hindi şereketleriniň 30-dan gowragynyň Türkmenistana gelip görmäge we Türkmenbaşy Halkara deňiz portunyň mümkinçilikleri bilen tanyşmaga isleg bildirýändiklerini beýan etdi.
«Türkmendeňizderýaýollary» agentliginiň habar bermegine görä, taraplar deňiz ulaglary pudagynda hyzmatdaşlygy ýola goýmagyny, şeýle-de, Türkmenbaşy Halkara deňiz portunyň üsti bilen ýükleri üstaşyr geçirmegiň mümkinçiligini ara alyp maslahatlaşdylar.
Şeýle hem duşuşygyň barşynda Türkmenbaşy Halkara deňiz portynyň ýükleri üstaşyr geçirmekde Demirgazyk-Günorta halkara ulag geçelgesinde möhüm ornunyň bardygy bellenildi.
«Türkmendeňizderýaýollary» agentliginiň wekilleri tarapymdan hindi tarapyna Türkmenbaşy Halkara deňiz porty dolandyrmakda tejribe alyşmak boýunça hyzmatdaşlygy ýola goýmagy teklip edildi.
Ozaldan mälim bolşy ýaly, Türkmenbaşy Halkara deňiz portunyň umumy meýdany 150 gektardan gowrak bolup, onuň umumy ýyllyk kuwwatly 17 million tonna ýük, şol sanda 300 müň ýolagçy, 75 müň ýük awtoulagy, 400 müň TEU konteýneri, 3 million tonna ürgün ýükleri we nebit önümlerini hasaba almazdan 4 million tonna umumy ýükleri geçirmäge ukyplydyr.
