Şu gün — 22-nji iýunda Arkadag şäherinde Medeniýet hepdeliginiň dabaralary başlandy. Öňümizdäki birnäçe günüň dowamynda Medeniýet hepdeliginiň açylyş dabarasyna gatnaşmak üçin ähli welaýatlardan gelen döredijilik işgärleri Arkadag şäherine ýygnandy.
Hususan-da, meşhur teatr hem sungat işgärleri, estrada we halk ýerine ýetirijileri, muzeý hem kitaphana hünärmenleri, suratkeşlerdir şahyrlar, professional ansambllardyr meşhur halk döredijiligi we etnografiki toparlary tomaşaçylara joşgunly medeni meýilnamalaryny hödürlärler. Medeniýet hepdeligi 27-nji iýuna çenli dowam eder.
Ýaş aýdymçylaryň we sazandalaryň konsertleri, suratlaryň sergileri, bezeg hem amaly sungatynyň eserleri, neşir önümleri we muzeý eksponatlary, fotosuratlar, film görkezilişleri hem-de hepdeligiň dowamynda guralan şygyr agşamlary milli medeniýetimiziň dürli taraplaryny açyp görkezer.
Şu ýylky Medeniýet hepdeliginiň dabaralarynyň çäginde «Kompozitor» çeper filminiň hem-de Aman Gulmämmedow adyndaky Döwlet drama teatrynyň sahnasynda akyldar şahyrymyz Magtymguly Pyragynyň ömrüne we döredijiligine bagyşlanan «Älem Nury» pýesasynyň ilkinji görkezilişiniň guralmagyna garaşylýar. Görogly adyndaky döwlet atçylyk sirki «Göroglynyň döreýşi» atly teatrlaşdyrylan sirk çykyşlary bilen ildeşlerimizi begendirer.
Medeniýet hepdeliginiň çäginde şygryýet agşamlary guralar we «Pähim-paýhas ummany Magtymguly Pyragy» ýyly mynasybetli yglan edilen bäsleşigiň ýeňijileri sylaglanar.
27-nji iýunda Medeniýet we sungat işgärleriniň we Magtymguly Pyragynyň şygryýet güni mynasybetli täze «Magtymguly Pyragy» medeni-seýilgäh toplumyndaky ýadygärlige gül desselerini goýmak dabarasy geçiriler.
