Şu gün — 2024-nji ýylyň 27-nji iýunynda Türkmenistanyň Daşary işler ministrliginiň Halkara gatnaşyklary institutynda Magtymguly Pyragynyň doglan gününiň 300 ýyllygy mynasybetli Halkara hukugy we deňeşdirme hukuk öwreniş we Žurnalistikanyň nazaryýeti we amalyýeti kafedralarynyň guramagynda «Magtymguly Pyragy — dünýä ähmiýetli şahsyýet» atly şygryýet agşamy geçirildi. Geçirilen çärä institutyň Halkara hukugy we Halkara žurnalistikasy fakultetleriniň talyplary gatnaşdylar. Şygryýet agşamynda çykyş edenler türkmen halkynyň beýik akyldary – Magtymguly Pyragynyň baý döredijilik mirasyna degişli şygyrlaryny çeper okadylar. Şahyryň ýakynda Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar instituty tarapyndan üç dilde çapdan çykan saýlanan eserler ýygyndysyndan birnäçe şygyrlar rus we iňlis dillerinde okaldy. Şeýle hem beýik akyldaryň edebi hem ruhy mirasynyň ähmiýeti dogrusynda täsirli maglumatlar paýlaşyldy.
Şygryýet agşamyna gatnaşan talyp A.Hemranazarowa institutda beýik akyldar Magtymguly Pyragynyň döredijiligini çuňňur öwrenmek bilen bagly şeýle çäreleri yzygider geçirilýändigini we munuň özleri üçin uly peýdalydygyny aýdyp berdi.
