2024-nji ýylyň 29-njy awgustynda Türkmenistanyň Ýaponiýadaky Adatdan daşary we Doly ygtyýarly ilçisi Atadurdy Baýramow Filippinler Respublikasynyň Ýaponiýadaky ilçisi Milen Garsiýa-Albano bilen duşuşdy. Bu barada Türkmenistanyň Ýaponiýadaky ilçihanasynyň resmi web-saýty 29-nji awgustda habar berdi.
Duşuşykda taraplar ikitaraplaýyn hyzmatdaşlygy mundan beýläk-de ösdürmek bilen bagly meseleleri ara alyp maslahatlaşdylar. Hususan-da, ýokary derejedäki özara saparlaryň, şeýle hem parlamentara, söwda-ykdysady hem-de medeni-ynsanperwer gatnaşyklary işjeňleşdirmegiň hyzmatdaşlygyň pugtalandyrylmagynda möhüm ähmiýete eýedigi nygtaldy. Mundan başga-da, taraplar halkara guramalarynyň arasynda täsirli özara gatnaşyklaryň möhümdigine ünsi çekdiler.
Duşuşygyň ahyrynda taraplar özara bähbitli ugurlarda iki döwletiň arasyndaky hyzmatdaşlygy pugtalandyrmaga mundan beýläk hem ygrarly boljakdyklaryny mälim etdiler.
