Soňky ýyllarda Türkmenistanyň at gazanan arhitektory, döwrümiziň beýik binagäri Milli Liderimiziň tagallalary esasynda gözellik babatda Aşgabadyň gaýtalanmajak binagärlik keşbi döredildi. Ol häzirki zaman ýaşaýyş jaý toplumlaryny, durmuş ähmiýetli möhüm desgalary, kaşaň binalary, bagy-bossanlyklary özünde jemläp, ýurdumyzyň jemgyýetçilik-syýasy, işewürlik, medeni we sport durmuşynyň merkezi hökmünde ykrar edilýär. Paýtagtymyzyň ýyl-ýyldan özgerýän keşbinde Watanymyzyň durmuş-ykdysady ösüşiniň yzygiderli depgini, köptaraply kuwwaty, halkymyzyň baý taryhy hem-de medeni däpleri öz beýanyny tapýar. Gurulýan binalardyr desgalar diňe bir baş şäherimiziň görküne görk goşman, eýsem, ilatyň ýaşaýyş-durmuş şertleriniň gowulanmagynda, halkymyza edilýän durmuş hyzmatlarynyň ýokary hilli bolmagynda hem möhüm ähmiýete eýedir.
Häzirki wagtda ak mermerli Aşgabat «Aziýanyň merjen şäheri» diýen ykrarnama eýe boldy we dünýäniň iň owadan, ýaşamak üçin amatly şertleri özünde jemleýän şäherleriniň birine öwrüldi. Munuň şeýle bolmagynda Gahryman Arkadagymyzyň başlangyjy esasynda işlenip taýýarlanan paýtagtymyzy ösdürmegiň täzeçil konsepsiýasynyň durmuşa geçirilmeginiň iňňän uly ähmiýeti bardyr. Bu günki gün adamlara has amatly durmuş şertleriniň döredilmeginiň döwlet syýasatymyzyň ileri tutulýan ugurlarynyň biri hökmünde kesgitlenilmegi baş şäherimizde alnyp barylýan işleriň mysalynda-da görmek bolýar. Täze taryhy döwürde Milli Liderimiz hem-de Arkadagly Gahryman Serdarymyz iri gurluşyk taslamalaryny öňe sürmek bilen, olaryň amala aşyrylmagynyň ähli tapgyrlaryny üns merkezinde saklaýarlar. Şunda özboluşly çözgütleriň, sanly tehnologiýalaryň, inženerçilik-tehniki işläp taýýarlamalaryň ornaşdyrylmagyna möhüm ähmiýet berilýär. Aşgabadyň ekologiýasy, ony bagy-bossanlyga öwürmek meselesinde bolsa bu ulgamda dünýäniň öňdebaryjy tejribesini, energiýa tygşytlaýjy tehnologiýalary ornaşdyrmak ileri tutulýar.
Daýanç KUWADOW,
Türkmen döwlet binägärlik-gurluşyk institutynyň talyby
