Mälim bolşy ýaly, şu ýylyň 24-nji sentýabrynda, mukaddes Garaşsyzlygymyzyň şanly baýramynyň öňüsyrasynda Türkmenistanyň Halk Maslahatynyň nobatdaky mejlisi geçiriler. Gahryman Arkadagymyzyň başlangyçlary, Arkadagly Gahryman Serdarymyzyň taýsyz tagallalary esasynda halk bilen häkimiýetiň jebisligini üpjün etmek, ýurdumyzda hemmetaraplaýyn kämil jemgyýeti kemala getirmek boýunça giň gerimli işler alnyp barylýar. Bu ugurda taryhy özgertmeler amala aşyrylyp, uly üstünliklere ýetilýär.
Türkmenistanyň Halk Maslahatynda ýurdumyzy mundan beýläk-de okgunly ösdürmek, halkymyzyň bagtyýar we abadan ýaşaýşyny üpjün etmäge gönükdirilen düýpli özgertmeleri durmuşa geçirmek barada ileri tutulýan wezipelere garalar. Ata Watanymyzyň iň täze taryhynda biziň ýetýän belent sepgitlerimiziň, gazanýan üstünliklerimiziň, halkymyzyň durmuşynda amala aşyrylýan düýpli özgertmeleriň esasy bar. Ol bolsa döwlet Garaşsyzlygymyzdyr. «Pähim-paýhas ummany Magtymguly Pyragy» ýylynda mukaddes Garaşsyzlygymyzy gazananymyza 33 ýyl dolýar.
Türkmen halkynyň Milli Lideri Gahryman Arkadagymyzyň, hormatly Prezidentimiziň halkymyzyň jebisligini we agzybirligini üpjün etmäge gönükdiren taglymatlary esasynda Garaşsyz, baky Bitarap Watanymyz uly ösüşlere gazanylyp, ýurdumyzda bagtyýar we abadan durmuş höküm sürýär. Mähriban Diýarymyzda kabul edilen il-ýurt bähbitli maksatnamalar üstünlikli amala aşyrylyp, halkymyz eşretli zamananyň hözirini görüp ýaşaýar.
Watanymyza wepaly, ýurdumyzyň ösüşlerine mynasyp goşant goşup bilýän ýaşlaryň ylym-bilimden ýüki ýetik, ökde hünärmenler bolup ýetişmeklerinde Milli Liderimiziň dürdäne eserleri, Arkadagly Gahryman Serdarymyzyň kitaplary uly ähmiýete eýedir. Olar her birimize durmuşymyzda iň ýakyn gollanmadyr. Türkmen halkynyň Milli Lideriniň başlangyjy boýunça we Arkadagly Gahryman Serdarymyzyň tagallalary bilen dünýä nusgalyk döwrebap Arkadag — ýaşlar şäheri guruldy. Bu waka türkmen taryhyna altyn harplar bilen ýazyldy.
Goý, il-ýurt, döwlet ähmiýetli işleri amala aşyrýan Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak bolsun!
Goşun BEGENJOW,
Türkmen döwlet maliýe institutynyň talyby
