2024-nji ýylyň 26-njy sentýabrynda Nýu-Ýork şäherinde Birleşen Milletler Guramasynyň Baş Assambleýasynyň 79-njy sessiýasynyň çäklerinde Türkmenistanyň Daşary işler ministri Raşid Meredow Ykdysady Hyzmatdaşlyk Guramasynyň (YHG) Baş sekretary Asad Majid Han bilen duşuşdy. Bu barada Türkmenistanyň Daşary işler ministrliginiň resmi web saýtynda 27-nji sentýabrda habar berildi.
Duşuşykda taraplar Türkmenistanyň YHG bilen hyzmatdaşlygynyň işjeňleşdirilendigini belläp, özara gatnaşyklaryň esasy ugurlaryny ara alyp maslahatlaşdylar. Ugurlaryň hatarynda energetika, transport we aragatnaşyk, söwda-ykdysady integrasiýa, sanlylaşdyrma we medeni gatnaşyklaryň ösmegi aýratyn bellenildi. Taraplar, şol sanda, guramanyň çäklerinde halkara hukuk binýadynyň pugtalandyrylmagy we ýurduň onuň kadr kuwwatyna goşýan goşandy barada aýratyn durup geçdiler.
Habarda bellenilişi ýaly, taraplar BMG-niň çäklerinde döredilen platformalary peýdalanyp, hyzmatdaşlygy güýçlendirmegiň mümkinçiliklerini ara alyp maslahatlaşdylar. Demirgazyk-Günorta we Gündogar-Günbatar ugurlary boýunça ulag-tranzit geçelgeleriniň kuwwatyny artdyrmaga, serhetüsti ykdysady işjeňligi höweslendirmäge aýratyn üns berildi.
Duşuşykda YHG-niň gatnaşmagynda geçiriljek öňde duran çäreleriň taýýarlyk işleri ara alnyp maslahatlaşyldy.
