Özbegistanyň maýa goýum, senagat we söwda ministri Laziz Kudratow 24-25-nji noýabrda iş sapary bilen Saud Arabystanyna bardy. Taraplar 2025-nji ýylda Samarkantda bilelikdäki işewürlik forumyny guramagyň mümkinçiliklerini ara alyp maslahatlaşdylar. Bu barada Özbegistanyň hökümetiniň metbugat gullugy habar berdi.
Syýasatçy Bütindünýä maýa goýum konferensiýasynyň 28-nji mejlisine gatnaşdy, şeýle hem ýurduň maýa goýum ministri Halid Al-Falih we iri halkara kompaniýalarynyň ýolbaşçylary bilen resmi gepleşikler geçirdi. Mejlisiň işine 100-den gowrak döwletiň 3000 wekili gatnaşdy.
Bilermenler halkara arenada maýa goýum “landşaftyna” täsir etjek esasy faktorlary kesgitlediler. Mundan başga-da, taraplar daşary ýurt maýa goýumlaryny çekmek strategiýalaryny ara alyp maslahatlaşdylar. Halid Al-Falih bilen geçirilen gepleşikleriň çäklerinde Kudratow Samarkantda bilelikdäki işewürlik forumyny guramagyň mümkinçiliklerini hem ara alyp maslahatlaşdy. Çäräniň 2025-nji ýylda geçirilmegi meýilleşdirilýär.
