Garaşsyz Watanymyzy durmuş-ykdysady taýdan ösdürmek boýunça kabul edilen maksatnamalaryň üstünlikli durmuşa geçirilmeginde milli ykdysadyýetimiziň senagat pudagyna, hususan-da, gurluşyk serişdeleriniň önümçiligine möhüm orun degişlidir. Hormatly Prezidentimiz Serdar Berdimuhamedowyň belleýşi ýaly: «Gurmak we döretmek Berkarar döwletiň täze eýýamynyň Galkynyşy döwrüniň esasy şygarydyr. Innowasion önümçilikleri döretmek, ilatyň ýaşaýyş-durmuş şertlerini düýpli özgertmek boýunça gurluşyk we senagat toplumynda uly işler amala aşyrylýar». Bu bolsa ýurdumyzy durmuş-ykdysady taýdan ösdürmäge gönükdirilen maksatnamalary durmuşa geçirmekde toplumyň aýratyn ähmiýete eýedigini aýdyň äşgär edýär.
Häzirki döwürde gurluşyk pudagyna gönükdirilýän ägirt uly maýa goýum serişdeleriniň, ýurdumyzda döredilen amatly maýa goýum gurşawynyň, telekeçiligi goldamak babatda durmuşa geçirilýän netijeli çäreleriň şähergurluşyk syýasatynyň üstünlikli amala aşyrylmagyna goşant goşýandygyny aýratyn bellemek gerek. Bu syýasatyň çäklerinde paýtagtymyzda we welaýatlarda önümçilik, medeni-durmuş maksatly desgalaryň her ýylda ençemesi gurlup ulanmaga berilýär, ozal bar bolanlarynyň durky täzelenilýär. Şeýle giň gerimli işler halkymyzyň abadan we bagtyýar durmuşyny üpjün etmäge, şäherdir obalarda halkara ülňülere laýyk gelýän möhüm düzümleri kemala getirmäge gönükdirilen durmuş ugurly syýasatyň aýdyň netijesi bolup durýar.
Ata Watanymyz Türkmenistanda ykdysadyýeti senagatlaşdyrmak we daşary ýurtlardan getirilýän harytlaryň ornuny tutýan önümleri özümizde öndürmek ýoluny saýlap almak bilen bagly yzygiderli çäreler durmuşa geçirilýär. Şeýle hem innowasion tehnologiýalar bilen enjamlaşdyrylan häzirki zaman kärhanalarynyň gurluşygyna, önümçilik kuwwatlyklarynyň yzygiderli artdyrylmagyna, ýerli çig malyň esasynda ýurdumyzda öndürilýän gurluşyk serişdeleriniň ýokary hilini we bäsdeşlige ukyplylygyny üpjün etmäge aýratyn ähmiýet berilýär.
Garaşsyzlyk ýyllary içinde ýurdumyzda Bäherden, Balkan we Lebap sement zawodlary gurlup ulanmaga berildi. Mälim bolşy ýaly, sement – gurluşyk üçin iň zerur önümleriň biri bolup durýar. Ýurdumyzda hereket edýän zawodlarda täze innowasion tehnologiýalar ornaşdyrylyp, olaryň esasynda dünýä ölçeglerine doly laýyk gelýän ýokary hilli önümler öndürilýär. Şu ýylyň mart aýynda Lebap welaýatynyň Köýtendag etrabynda ýylda 1 million tonna sement öndürmäge ukyply Lebap sement zawodynyň ikinji tapgyry açylyp ulanmaga berildi. Şeýle hem 2024-nji ýylyň maý aýynda bolsa Ahal welaýatynda ýerleşýän Bäherden sement zawodynyň ikinji tapgyry ulanmaga berildi. Zawodyň kuwwatlylygy ýylda 1 million tonna sement öndürmäge niýetlenendir. Bu günki günde täze açylan sement zawodlarynyň ýokary hilli önümleri ýurdumyzda ýaýbaňlandyrylýan gurluşyklarda peýdalanylýar, şeýle-de olara daşary ýurt bazarlarynda hem uly isleg bildirilýär.
Kasymmyrat DURDYÝEW
Ýagşygeldi Kakaýew adyndaky
Halkara nebit we gaz uniwersitetiniň mugallymy
