2024-nji ýylyň 9-njy dekabrynda “Arçabil” myhmanhanasynda FAO-nyň sebitleýin taslamasynyň ilkinji duşuşygy we tanyşdyryş seminari geçirildi. Taslama Pandemiýa Gaznasy tarapyndan maliýeleşdirilýär. Duşuşyga Oba hojalyk ministrligi, Saglygy goraýyş ministrligi, Daşky gurşawy goramak ministrligi we beýleki gyzyklanýan edaralaryň wekilleri, şol sanda FAO, BSG, USAID wekilleri gatnaşdy. Halkara bilermenler hökmünde FAO bilermenleri Eran Raýzman, Durýa Çaryphan we Dsani Ester çykyş etdiler. Seminaryň esasy maksady azyk we oba hojalyk pudagynda weterinariýa barlaglarynyň we antimikrob dermanlara durnuklylygy gözegçilik ulgamlarynyň mümkinçiliklerini bahalandyrmak boldy.
Duşuşykda Türkmenistanyň Oba hojalyk ministrliginiň döwlet weterinariýa gullugynyň halkara we ylmy aragatnaşyklar bölüminiň başlygy Arslan Soltanmyradow çykyş etdi. Ol azyk we oba hojalyk pudaklarynda antimikrob dermanlara durnuklylygy gözegçilikde saklamagyň möhüm mowzugyna ünsi çekdi. Esasy meseleler: oba hojalygynda antimikrob dermanlaryň ulanylyşyna gözegçilik etmegiň ähmiýeti; antibiotiklere durnuklylygyň adamlaryň, haýwanlaryň we daşky gurşawyň saglygyna täsiri; durnukly ştammlaryň ýaýramagynyň öňüni almak üçin pudagara hyzmatdaşlygyň zerurlygy; töwekgelçilikleri dolandyrmak üçin täsirli strategiýalary ornaşdyrmak boýunça teklipler.
Şu nukdaýnazardan, Türkmenistanda milli we welaýat derejesinde weterinariýa laboratoriýalarynyň mümkinçiliklerini bahalandyrmak we gözegçilik etmek, şeýle hem müdahale ileri tutulýan ugurlaryny kesgitlemek meýilleşdirilýär. Türkmenistanda FAO-nyň “Antimikrob dermanlara durnuklylygy gözegçilikde saklamak üçin laboratoriýalar we gözegçilik ulgamlary üçin baha beriş guraly” (FAO – ATLASS) ulanylyp, azyk we oba hojalyk pudagynda antimikrob dermanlara durnuklylygy gözegçilikde saklamak boýunça milli gözegçilik ulgamynyň bahalandyrmasy geçiriler.
