Türkmenistanyň Prezidenti Serdar Berdimuhamedow Malaýziýanyň premýer-ministri Dato Seri Anwar bin Ibrahimyň çakylygy boýunça 18-19 dekabr aralygynda Malaýziýada ilkinji resmi saparynda boldy. Taraplar bilelikdäki işewürler geňeşini döretmäge taýýardyklaryny aýtdylar.
Iki döwletiň ýolbaşçylary ýurtlaryň arasyndaky ykdysady hyzmatdaşlygyň uly mümkinçiliklere eýedigini hasaplaýarlar. Şunuň bilen baglylykda, bu ugurda ähli mümkinçilikleri durmuşa geçirmek üçin taraplar ony deňlik we özara peýda esasynda ösdürmäge taýýardyklaryny aýtdylar.
Serdar Berdimuhamedow we Dato Seri Anwar bin Ibrahim ulag, medeniýet, bilim, syýahatçylyk we sport ugurlarynda ikitaraplaýyn hyzmatdaşlygy giňeltmegiň tarapdarydyklaryny hem aýtdylar. Olaryň pikiriçe, bu Türkmenistan bilen Malaýziýanyň arasyndaky gatnaşyklaryň pugtalandyrylmagyna oňyn täsir eder.
