17-nji fewralda Türkmenistanyň BMG-niň Ženewadaky edarasynyň ýanyndaky Hemişelik wekilhanasy «Interpeace Building» platformasy bilen bilelikde Bütindünýä Söwda Guramasynyň (BSG) ştab-kwartirasynda «Söwda arkaly durnuklylygy berkitmek: durnukly parahatçylyk üçin hyzmatdaşlyk» atly çäre geçirdi.
Çäre ykdysady ösüşiň, durnukly parahatçylygyň we bitaraplyk ýörelgeleriniň özara arabaglanyşygyna bagyşlandy. Oňa halkara guramalaryň, köpçülikleýin habar beriş serişdeleriniň we hususy pudagyň wekilleri gatnaşdy. Bu barada Türkmenistanyň Hemişelik wekilhanasynyň resmi saýtynda habar berildi.
BSG-niň Baş direktory, doktor Ngozi Okonjo-Iweala çärä gatnaşyjylara wideoýüzlenme bilen çykyş etdi.
Mundan başga-da, Türkmenistanyň hemişelik wekili Wepa Hajyýew çykyş edip, 2025-nji ýylyň Türkmenistanyň başlangyjy bilen BMG-niň Baş Assambleýasy tarapyndan «Halkara parahatçylyk we ynanyşmak ýyly» diýip yglan edilendigini belledi. Ol Türkmenistanyň hemişelik Bitaraplygynyň 30 ýyllygynyň ýurduň parahatçylykly hyzmatdaşlyk, ykdysady integrasiýa we durnukly ösüş ýörelgelerine ygrarlydygyny tassyklaýandygyny nygtady. Şeýle-de türkmen tejribesiniň bitaraplygyň üzňeleşmek däl-de, eýsem, halkara hyzmatdaşlygy we durnukly söwdany ösdürmek üçin amatly şertleri döredýändigini subut edendigi bellenildi.
Çäräniň dowamynda Halkara Söwda Merkezi (ITC), Halkara Söwda Palatasy (ICC) we öňdebaryjy hususy kompaniýalaryň wekilleri işewürleriň parahatçylyk dörediji başlangyçlara we söwda-ykdysady hyzmatdaşlyga işjeň gatnaşmagyny üpjün etmek boýunça anyk ädimleri ara alyp maslahatlaşdylar.
Bu çäre pikir alyşmak, öňdebaryjy tejribeleri paýlaşmak we strategiýalary işläp taýýarlamak üçin amatly platforma öwrüldi diýip, habarda bellenilýär.
