Garaşsyz Watanymyzda Ýer ýüzüniň birnäçe döwletleri, abraýly halkara guramalary bilen dünýäde parahatçylygyň, ählumumy howpsuzlygyň hem-de durnukly ösüşiň bähbidine dostlukly gatnaşyklary ösdürmek, birek-birege ynanyşmak, deňhukukly hyzmatdaşlyk ýörelgelerine esaslanýan gatnaşyklary ýola goýmak, sebitde we dünýäde durnuklylygy saklamak, netijeli hyzmatdaşlygy ösdürmek üçin giň mümkinçilikler döredilýär.
2025-nji ýylda “Halkara parahatçylyk we ynanyşmak ýyly” atly şygary dabaralandyrmak maksady bilen dürli halkara çäreler, maslahatlar we beýleki çäreler geçirilýär. Bu başlangyç diňe bir Türkmenistanyň däl, eýsem, bütin dünýä jemgyýetçiliginiň parahatçylykly we ynanyşmaga esaslanýan geljege bolan ymtylyşlaryna hyzmat eder.
Türkmenistanyň bu ugurdaky işjeňligi halkara giňişlikde ýurduň abraýyny has-da belende göterer we halkara hyzmatdaşlygyň täze belentliklere galmagyna ýardam berer.
Parahatçylyk we ynanyşmak adamzadyň abadan geljegini üpjün etmekde biri-biri bilen aýrylmaz baglanyşykly iň gymmatly düşünjeler bolup, ol häzirki wagtda döwletleriň we halklaryň arasynda hyzmatdaşlygyň hem-de ösüşiň baş ýörelgesine öwrülýär.
Hormatly Prezident Serdar Berdimuhamedowyň ýolbaşçylygynda Türkmenistan parahatçylygy, durnukly ösüşi we halkara hyzmatdaşlygyny pugtalandyrmak boýunça oňyn syýasaty durmuşa geçirýär. Bu başlangyç diňe bir milli çäkde däl, eýsem, halkara forumlary, maslahatlary we beýleki çärelere gatnaşygy arkaly bütin dünýä derejesinde giň gerimde ýaýbaňlandyrylýar.
Bu ýörelgä Türkmenistanyň Milli Lideri Gurbanguly Berdimuhamedowyň döredijilik ýoly hem aýdyň şahadat berýär. Onuň “Türkmenistan — parahatçylygyň we ynanyşmagyň Watany” atly goşgusy ýurdumyzyň bu ugurdaky abraýyny has-da berkidýär.
Aýna ÇARYÝEWA
S.A.Nyýazow adyndaky Türkmen oba hojalyk
uniwersitetiniň mugallymy
