HYYweÖU-nyň mugallymlary Erasmus+ maksatnamasynyň çäklerinde Alba-Iulia şäheriniň “1 Decembrie 1918” uniwersitetine iş sapary bilen barypdyr. Saparyň möhleti 2025-nji ýylyň 24-28-nji mart aralygynda dowam edýär.
Saparyň ilkinji güni rumin kärdeşleri bilen bolan duşuşykda türkmen mugallymlary onlaýn kurslary düzmekde we bilim ulgamyny dolandyrmakda tehnologiýalaryň ulanylmagy boýunça tejribe alyşdylar. Taraplar, hususan-da Halkara ynsanperwer ylymlary we ösüş uniwersiteti bilen Alba-Iulia şäheriniň “1 Decembrie 1918” uniwersitetiniň arasyndaky hyzmatdaşlyk memorandumynyň esasynda uzak möhletleýin hyzmatdaşlygyň geljegi, şol sanda “Iki diploma” we ýokary bilimden soňky okuw maksatnamalarynyň döredilmegi meselelerine aýratyn üns berdiler.
Saparyň ahyrynda, HYYweÖU-nyň mugallymlarynyň Rumyniýanyň öňdebaryjy ýokary okuw mekdepleriniň biri bolan bu uniwersitetiň okuw maksatnamalaryny işläp düzmek we kämilleşdirmek, şeýle hem möhüm ugurlarda ylmy gözlegler geçirmek boýunça tejribesi bilen tanyşmagyna garaşylýar.
