Hormatly Prezidentimiziň ýurdumyzyň ykdysadyýetini innowasion ugra geçirmegi çaltlandyrmak, işewürlik hem-de maýa goýum işjeňligini artdyrmak, ylmy gözlegleri köp talap edýän pudaklarda iş bilen üpjünçiligi ýokarlandyrmak, öňdebaryjy maglumat tehnologiýalaryny jemgyýetiň ähli ugurlaryna ornaşdyrmak boýunça alyp barýan döwlet syýasatynyň halkymyzyň ýaşaýyş-durmuş derejesini has-da ýokarlandyrmaga mümkinçilik berýändigini aýratyn belläp geçmek gerek. Bu ugurdaky tagallalaryň çäginde milli ykdysadyýetimiziň ähli pudaklarynda, şol sanda ylymda we bilimde sanly tehnologiýalar ornaşdyrylýar. Sanly tehnologiýalaryň bu ulgama ornaşdyrylmagy ýurdumyzda dünýäniň öňdebaryjy gazananlarynyň esasynda milli sanly bilim ulgamynyň mundan beýläk-de ösdürilmegini, okatmagyň innowasion çemeleşmeleri bilen utgaşyklylykda maglumat-kommunikasiýa tehnologiýalarynyň biliminiň ähli başlangyçlarynda giňden ornaşdyrylmagyny şertlendirýär.
Häzirkizaman dünýäsi sanlylaşma döwrüni başdan geçirýär. Tehnologiýanyň örän çalt depginde ösmegi bilen sanly ulgam durmuşymyzyň aýrylmaz bir bölegine öwrüldi. Ol diňe bir iş ýerlerinde ýa-da edara-kärhanalarda däl, eýsem, gündelik ýaşaýşymyzda hem giňden ornaşýar. Sanly ulgamyň durmuşa getiren mümkinçilikleri, ýeňillikleri we onuň jemgyýetiň ösüşindäki orny barada gürrüň etmek örän wajypdyr.
Ilki bilen, sanly ulgam maglumat alyş-çalşygynda täze mümkinçilikleri döretdi. Internetiň giňden ýaýramagy bilen dünýäniň islendik ýerindäki maglumatlara gysga wagtyň içinde elýeterli bolmak mümkinçiligi döredi. Bilim ulgamynda onlaýn sapaklaryň, elektron kitaplaryň we sanly okuw serişdeleriniň peýda bolmagy, okyjylara täzeçil öwrenmek mümkinçiliklerini döretdi. Mundan başga-da, sanly ulgam dolandyryş ulgamyny hem kämilleşdirdi. Döwlet hyzmatlarynyň sanly görnüşe geçirilmegi bilen raýatlara edilýän hyzmatlaryň hili ýokarlandy, wagty tygşytlamaga mümkinçilik döredi.
Sanly ykdysadyýet hem ýurdumyzyň ösüşine uly itergi berýär. Internet söwdasy, elektron tölegler, onlaýn bank hyzmatlary ýaly mümkinçilikler diňe bir telekeçilik üçin däl, eýsem, ilatyň ýaşaýyş derejesini ýokarlandyrmak üçin hem örän peýdalydyr. Sanly marketing we maglumat analitikasy ýaly ugurlar bolsa, täze hünärleriň we iş ýerleriniň döremegine şert döredýär.
Sanly ulgam diňe bir amatlylyk döretmän, eýsem, jemgyýetiň aragatnaşyk mümkinçiliklerini hem artdyrdy. Jemgyýetçilik torlarynyň üsti bilen adamlar biri-biri bilen habarlaşyp bilýär, pikir alyşýarlar, dostluk gatnaşyklaryny saklaýarlar. Bu bolsa, jemgyýetçilik gatnaşyklarynyň hem täze görnüşlerini kemala getirdi.
Fazilat YLHAMBEKOWA
Daşoguz welaýatynyň Beki Seýtäkow adyndaky
mugallymçylyk mekdebiniň talyby
