Portugaliýaly futbolçy, Saud Arabystanynyň “Al-Nassr” klubynyň oýunçysy Kriştianu Ronaldu Forbes žurnalynyň iň köp girdeji gazanan türgenleriniň sanawynda üçünji gezek yzygiderli we karýerasynda bäşinji gezek birinji orny eýeledi. 40 ýaşly hüjümçiniň girdejisi 275 million dollar boldy.
Iň köp girdeji gazanan on türgeniň ýyllyk umumy girdejisi 1,4 milliard dollar bolup, ikinji ýyl yzly-yzyna sanawyň ilkinji onlugyndaky her bir türgeniň girdejisi 100 million dollardan geçdi.
Sanawda ikinji orny NBA-nyň “Golden State” klubynyň oýunçysy Stefan Karri (156 million dollar) eýeledi, ol basketbolçylaryň arasynda Lebron Jeýmsiň girdeji rekordyny täzeledi.
Üçünji orny britaniýaly boksçy Taýson Fýuri (146 million dollar) eýeledi, ol soňky ýylda ukrainaly Aleksandr Usik bilen iki gezek duşuşyp, ýeňildi we karýerasyny tamamlandygyny yglan etdi.
Sanawyň ilkinji onlugyna giren beýleki türgenler:
- Dak Preskott (amerikan futboly) – 137 million dollar (NFL üçin rekord);
- Lionel Messi (futbol) – 135 million dollar;
- Lebron Jeýms (basketbol) – 133,8 million dollar (şahsy rekord);
- Huan Soto (beýsbol) – 114 million dollar (MLB üçin rekord);
- Karim Benzema (futbol) – 104 million dollar;
- Söhýeý Otani (beýsbol) – 102,5 million dollar;
- Kevin Durent (basketbol) – 101,4 million dollar.
Şeýle hem, Aleksandr Usik we golfçy Jon Ram 100 million dollardan gowrak girdeji gazandylar, ýöne sanawa girip bilmediler.
Forbes žurnalynyň 1990-njy ýyldan bäri geçiren hasaplamalaryna görä, sport karýerasynda Ronaldundan has köp girdeji gazanan ýeke-täk türgen amerikan boksçysy Floýd Meýwezer bolup, ol 2015-nji ýylda 300 million dollar we 2018-nji ýylda 285 million dollar gazandy.
