2025-nji ýylyň 14-nji maýynda Türkmenistanyň Mejlisinde Birleşen Milletler Guramasynyň Ýewropa ykdysady komissiýasynyň (UNECE) bilermenleri Tamara Kutonowa we Jon Marko Çorç bilen Mejlisiň wekilleriniň duşuşygy boldy.
Duşuşygyň barşynda hormatly Prezidentimiziň ýurdumyzy durmuş-ykdysady taýdan ösdürmegiň maksatnamasynda obasenagat toplumynyň we beýleki pudaklaryň sazlaşykly ösüşiniň, daşky gurşawy goramagyň, halkymyzyň amatly durmuş derejesini üpjün etmegiň möhüm şerti hökmünde suw serişdelerini rejeli peýdalanmak boýunça alnyp barylýan işleriň ähmiýeti barada nygtaldy.
Duşuşykda ikitaraplaýyn hyzmatdaşlygyň mümkinçilikleri, ekologiýa howpsuzlygyna degişli meselelerde parlamentleriň alyp barýan işleri we öňde durýan wezipeler ara alnyp maslahatlaşyldy.
Türkmenistanyň Birleşen Milletler Guramasynyň Ýewropa ykdysady komissiýasy (UNECE) bilen alyp barýan netijeli hyzmatdaşlygynyň çäginde suw serişdelerini netijeli ulanmak boýunça ýurdumyzyň ençeme halkara resminamalaryna, şol sanda Serhetüsti suw akarlaryny we halkara köllerini goramak we ulanmak boýunça Helsinki şäherinde kabul edilen Konwensiýa goşulmagynyň hem-de ekologiýa howpsuzlygyny üpjün etmäge gönükdirilen milli kanunçylygyň yzygiderli kämilleşdirilmeginiň ähmiýeti barada nytalayp geçildi.
Şeýle hem duşuşykda Türkmenistanyň Mejlisi tarapyndan kabul edilen «Tebigaty goramak hakynda», «Agyz suwy hakynda», «Ekologiýa seljermesi hakynda» Türkmenistanyň kanunlarynyň ýurdumyzyň we sebitleriň ekologiýa abadançylygyny üpjün etmäge gönükdirilen maksatnamalaýyn işleriň hukuk, ykdysady we guramaçylyk esaslaryny berkitmekdäki ähmiýeti barada aýdyldy.
