Ýene birnäçe günden gojaman Hazaryň türkmen kenaryna bezeg berip oturan «Awaza» milli syýahatçylyk zolagy halkara jemgyýetçiligiň ünsüni özüne çeker. Hormatly Prezidentimiziň gol çeken Kararyna laýyklykda, şu ýylyň 4 — 8-nji awgusty aralygynda bu ýerde Birleşen Milletler Guramasynyň Deňze çykalgasy bolmadyk ösüp barýan ýurtlar boýunça üçünji maslahaty geçiriler.
Mälim bolşy ýaly, «Awaza» milli syýahatçylyk zolagynda döwlet Baştutanlarynyň, hökümet wekiliýetleriniň duşuşyklary, halkara işewürler maslahatlary, sergiler, şeýle hem daşary ýurtlaryň tanymal estrada aýdymçylarydyr artistleriniň gatnaşmagyndaky sungat festiwallary, möhüm jemgyýetçilik çäreleri yzygiderli geçirilýär. 2021-nji ýylyň 6-njy awgustynda Hazaryň türkmen kenarynda Merkezi Aziýanyň döwletleriniň Baştutanlarynyň nobatdaky konsultatiw duşuşygy boldy. Forumyň çäklerinde Merkezi Aziýa ýurtlarynyň Zenanlarynyň dialogy, sebit ýurtlarynyň halkara sergisi, ykdysady forumy, milli tagamlaryň sergisi, sungat ussatlarynyň dabaraly baýramçylyk konserti hem guraldy. «Awaza — 2023» atly halkara tans we folklor festiwaly, Halkara parahatçylyk we ynanyşmak ýylynda «Awaza — dostluk mekany» atly halkara tans we folklor festiwaly şeýle giň gerimli halkara çäreleriň üstüni ýetirdi.
Türkmenistan döwletara gatnaşyklarda ynanyşmak, deňhukuklylyk, birek-birege hormat goýmak ýörelgelerine ygrarly bolmagynda galýar hem-de bu gatnaşyklarda hemişe ygtybarly hyzmatdaş, açyk ýurt hökmünde tanalýar. Birek-birege düşünişmek, özara bähbitlilik ýörelgelerine esaslanýan köptaraplaýyn hyzmatdaşlygyň geljegi uludyr. Türkmenistan BMG-niň howandarlygynda «Awaza» milli syýahatçylyk zolagynda geçiriljek Deňze çykalgasy bolmadyk ösüp barýan döwletleriň üçünji maslahatyna dostlukly ýagdaýda pikir alyşmak, onuň çäklerinde köptaraplaýyn hyzmatdaşlygyň ileri tutulýan wajyp ugurlaryny kesgitlemek üçin açyk dialog platformasy — deňhukukly gepleşikler meýdançasy hökmünde garaýar.
Leýli JUMANAZAROWA,
Seýitnazar Seýdi adyndaky Türkmen döwlet mugallymçylyk institutynyň talyby.
