2025-nji ýylyň 4-nji awgustynda «Awaza» Milli syýahatçylyk zolagynynyň çäklerinde ýerleşýän “Awaza sport toplumynda” BMG-niň deňze çykalgasy bolmadyk ösüp barýan döwletler boýunça Üçünji Maslahatynyň çäklerinde Ýaşlar forumynyň açylyş dabarasy boldy. Foruma köp sanly daşary ýurtlardan gelen ýaş liderler, Türkmenistanyň Prezidentiniň ýanyndaky Döwlet gulluk akademiýasynyň, Türkmenistanyň Bilim ministrliginiň, Daşky gurşawy gormaka ministrliginiň Magtymguly adyndaky Ýaşlar guramasynyň Merkezi geňeşiniň wekilleri gatnaşýarlar.
Forumyň maksady – BMG-niň Durnukly ösüş ulgamyndaky Gün tertibini durmuşa geçirmekde ýaşlaryň gatnaşygyny giňeltmekden ybaratdyr. Birleşen Milletler Guramasynyň “Ýaşlar – 2030” strategiýasynyň maksatlaryna we wezipelerine doly laýyk gelmek bilen, meýilleşdirilen ähli çäreler dürli medeniýetlere, sebitlere, garaýyşlara wekilçilik edýän ýaşlaryň arasynda netijeli dialogy ösdürmäge, durnukly ösüşiň umumy wezipelerini çözmek işine gatnaşmak mümkinçiliklerini giňeltmäge gönükdirilen.
Forumyň gün tertibinde halkara hyzmatdaşlyk, innowasiýalar we ýaşlaryň ählumumy ösüşindäki orny bilen baglanyşykly meseleler orun alýar. Çäräniň esasy maksady parahatçylyk, ynanyşmak we medeniýetara dialog ýaly ýörelgeleri öňe sürmekden ybarat bolmak bilen, forum halklaryň arasyndaky ynsanperwer gatnaşyklary pugtalandyrmaga ýardam berer.
Gözel PIRMUHAMEDOWA
Halkara ynsanperwer ylymlary we ösüş
uniwersitetiniň uly mugallymy
