Berkarar döwletiň täze eýýamynyň Galkynyşy döwründe ata Watanymyzda her bir gün toýdur-baýramlara, şanly senelere beslenýär. Agzybir hem-de zähmetkeş halkymyz Gahryman Arkadagymyzyň hem-de Arkadagly Gahryman Serdarymyzyň daşyna jem bolup, Garaşsyzlygyň 34 ýyllyk toýuny uly ruhubelentlik bilen belledi.
Tylla güýzde döwlet derejesinde ýokary guramaçylyk bilen geçirilýän Garaşsyzlyk baýramy halkymyzyň kalbynda buýsanç duýgularyny oýarýar. Bu baýramçylyga mynasyp taýýarlyk görmek maksady bilen ähli pudaklarda zähmet üstünlikleri gazanylýar. 34 ýyl — taryh üçin gysga döwür bolsa-da, bu ýyllaryň dowamynda amala aşyrylan özgertmeler asyrlara barabar ösüşleri öz içine alýar.
Türkmenistan häzirki wagtda halkara giňişliginde mynasyp orun eýeleýär. Dünýä döwletleri, şol sanda Birleşen Milletler Guramasy bilen alnyp barylýan hyzmatdaşlyklar ýurdumyzyň parahatsöýüjilikli, ynsanperwer ýörelgeleriniň dünýä derejesinde goldawa eýe bolýandygyny görkezýär.
Bilim, ykdysadyýet, eksport, sanly ulgam — ähli ugurlarda ösüşler Garaşsyzlygyň halkymyza peşgeş beren miwesidir. “Türkmenistanda öndürilen” ýazgyly önümleriň içerki we daşary ýurt bazarlarynda giňden tanalmagy hem bu ösüşiň aýdyň subutnamasydyr.
Ýaş nesiller üçin döredilen mümkinçilikler aýratyn buýsanç döredýär. Körpe mekdep okuwçylaryna sowgat berilýän kompýuterler, döwrebap kitaphanalar, ýokary okuw jaýlarynyň artmagy, halkara bäsleşiklerde gazanylýan üstünlikler — bularyň hemmesi Garaşsyzlygyň datly miwesidir.
Asuda asmanyň astynda, parahat zeminiň üstünde ýaşamak — halkymyzyň iň uly bagty. Mugallymlar üçin bolsa, şeýle mümkinçilikler bilen ýaş nesle bilim bermek, Watanyň geljegine goşant goşmak kalby guwandyrýan mukaddes zähmetdir.
Aýgül BEGNAZAROWA
Halkara ynsanperwer ylymlary we ösüş
uniwersitetiniň talyby
