Türkmenistanyň sport ulgamynda alnyp barylýan üstünlikli özgertmeler döwrüň talabyna laýyklykda ösüp gelýän ýaşlaryň beden we ruhy taýdan kämil şahsyýetler bolup ýetişmegine giň mümkinçilik döredýär. 2025–2026-njy okuw ýylynda hem Ahal welaýatynyň Ýaş olimpiýaçylary taýýarlaýan sport mekdep-internatynda türgenleşikler dowam edýär. Bu okuw ýylynda mekdepde sportuň dürli görnüşleri boýunça okuw-türgenleşik işleri guralyp, ýaşlaryň sagdyn ösüşi üçin ähli şertler döredilýär.
Ýaş olimpiýaçylary taýýarlaýan mekdepde häzirki wagtda sport görnüşleriniň 9-sy boýunça türgenleşikler alnyp barylýar: futbol, woleýbol, boks, erkin göreş, dzýudo, milli göreş, guşakly göreş, ýeňil atletika, agyr atletika. Bu ýerde döredilýän mümkinçilikler ýaş türgenleriň ukyp-başarnyklaryny ýüze çykarmakda, olary sebit hem milli derejedäki ýaryşlara taýýarlamakda möhüm ähmiýete eýedir.
Mekdep internatymyzda okuw-türgenleşik işleri dünýäniň öňdebaryjy tejribelerine laýyklykda alnyp barylýar. Okuwçylaryň sport taýýarlygyny güýçlendirmek üçin döwrebap türgenleşik enjamlary, ýöriteleşdirilen sport meýdançalary, täze tehnologiýalar işjeň peýdalanylýar. Tälimçilerimiz ýaş türgenleriň diňe fiziki taýdan däl, eýsem, ruhy taýdan hem kämilleşmegine aýratyn üns berýärler. Okuwçylara sportuň terbiýeçilik ähmiýeti, sagdyn durmuş ýörelgeleri, Watana wepalylyk, toparlaýyn işiň ähmiýeti barada sapaklar berilýär.
Jemläp aýdanyňda, Ahal welaýatynyň Ýaş olimpiýaçylary taýýarlaýan mekdep-internatynda guralýan türgenleşikler ýaşlaryň sporta bolan höwesini artdyrýar, olaryň sagdyn durmuş ýörelgelerini berkidýär hem-de ýurdumyzyň sport abraýynyň has-da ýokarlanmagyna goşant goşýar. Mukaddes Garaşsyzlygymyzyň 34 ýyllygy baýram edilýän şu günlerde ýaş türgenleriň üstünlikleri ýurdumyzyň ösüşleriniň aýdyň nyşany bolup, Türkmenistanda sporty ösdürmek boýunça alnyp barylýan döwlet syýasatynyň miwesidir.
Öwezmyrat ANNAKOW,
Ahal welaýatynyň Ýaş olimpiýaçylary taýýarlaýan sport mekdep-internatynyň okuw-sport işleri boýunça orunbasary.
