Sanly tehnologiýalaryň ösmegi bilen dünýäniň ähli künjeginde maglumat alyş-çalyş usullary düýpli özgerdi. Bu ösüş žurnalistika ulgamyna hem täsir edip, habar bermegiň, maglumat paýlaşmagyň hem-de jemgyýet bilen aragatnaşyk saklamagyň täze görnüşlerini döretdi. Häzirki wagtda žurnalistika diňe bir kagyz neşirleri bilen çäklenmän, internet sahypalary, mobil goşundylary we sosial ulgamlar arkaly hem giňden ýaýbaňlanýar.
Sanly ulgam arkaly habar bermek tizligi, elýeterliligi we täsirliligi bilen tapawutlanýar. Žurnalistler üçin bu mümkinçilik habarlary wagtynda, giň okyjy gatlagyna ýetirmekde möhüm ähmiýete eýedir. Şeýle hem, sanly giňişlikde okyjynyň seslenmesini almak, pikir alyşmak we jemgyýet bilen göni aragatnaşyk saklamak mümkinçiligi döredilýär.
Sanly žurnalistika diňe bir maglumat bermek bilen çäklenmän, jemgyýetçilik pikirini kemala getirmekde, jemgyýetiň sesini eşitmekde we jemgyýet bilen aragatnaşyk gurmakda möhüm gurala öwrüldi. Şeýlelikde, žurnalistika jemgyýetiň ösüşine täsir edýän, jemgyýetçilik jogapkärçiligini öz üstüne alýan ulgam hökmünde çykyş edýär.
Şeýle-de bolsa, sanly giňişlikde ýüze çykýan käbir kynçylyklar hem bardyr. Maglumatlaryň köpelmegi bilen ýalan habarlar ýaýramak, çeşmeleriň takyklygynyň peselmegi, maglumat howpsuzlygynyň üpjün edilmegi ýaly meseleler žurnalistleriň öňünde täze wezipeleri goýýar. Şonuň üçin žurnalistleriň esasy borjy — hakykata esaslanýan, takyk, ygtybarly we jemgyýetçilik jogapkärçiligine laýyk gelýän maglumatlary taýýarlamakdyr.
Geljekde žurnalistika ulgamynda emeli aň, maglumat seljeriji algoritmler, wirtual hakykat ýaly sanly tehnologiýalaryň giňden ulanylmagyna garaşylýar. Bu bolsa žurnalistleriň işini has-da netijeli we tiz amala aşyrmaga mümkinçilik berer. Şeýle-de bolsa, žurnalistikanyň esasy ýörelgeleri — hakykat, takyklyk we jogapkärçilik — hemişe öz güýjünde galmalydyr.
Netijede, sanly ulgam žurnalistikanyň ösüşinde täze sahypany açýar. Bu sahypa diňe tehnologiýa bilen däl, eýsem ynsanperwerlik, jemgyýetçilik jogapkärçiligi we jemgyýet bilen aragatnaşyk bilen doldurylmalydyr.
Aýlar AKMYRADOWA
Halkara ynsanperwer ylymlary we ösüş
uniwersitetiniň talyby
