2025-nji ýylyň 21-23-nji oktýabry aralygynda Aşgabatda BMG-niň Ilat gaznasynyň (UNFPA) Türkmenistandaky wekilhanasy ynam telefonynyň gulluklarynyň we Türkmenistanyň Gyzyl Ýarymaý Milli jemgyýetiniň Maşgala goldaw gulluklarynyň sosial işgärleriniň mümkinçiliklerini güýçlendirmek boýunça üç günlük okuw maslahatyny gurady.
Ýurduň ähli sebitlerinden hünärmenleriň gatnaşmagynda geçirilen okuw maslahatynyň dowamynda ýöriteleşdirilen durmuş hyzmatlaryny bermek meseleleri, hususan-da, maşgaladaky zorlugyň ýagdaýlaryna ýardam bermek, şeýle hem çylşyrymly ýagdaýlary dolandyrmak, şol sanda şeýle ýagdaýlarda işlemek üçin usulyýet we algoritmler ara alnyp maslahatlaşyldy.
Esasy üns amaly endikleri ösdürmäge gönükdirildi. Gatnaşyjylar hasaba alyş we hasabat resminamalaryny ýöretmegiň esaslaryny özleşdirdiler. Mundan başga-da, kyn durmuş ýagdaýlaryndan ejir çeken aýal-gyzlaryň howpsuzlygyna we goldawyna uly üns berildi: hünärmenler şahsy howpsuzlyk meýilnamasyny işläp taýýarlamagy, abonentlere habar bermegiň usullaryny we töwekgelçiligi kesgitlemegiň algoritmini öwrendiler.
Okuw maslahatyny Türkmenistanda bilim we maglumat işi bilen meşgullanýan hem-de ilatyň dürli gatlaklaryna, aýratyn-da, maşgaladaky kyn ýagdaýdan ejir çeken aýal-gyzlary goldamak boýunça 12 ýyldan gowrak tejribä eýe bolan «Keýik okara» jemgyýetçilik guramasynyň hünärmenleri geçirdiler.
«THE ASHGABAT TIMES».
