Berkarar döwletiň täze eýýamynyň Galkynyşy döwründe Arkadagly Gahryman Serdarymyzyň parasatly ýolbaşçylygynda adam saglygyny goramak, sagdyn nesli terbiýelemek we halkymyzyň abadançylygyny üpjün etmek döwlet syýasatynyň ileri tutulýan ugurlarynyň biri hökmünde öňe sürülýär. Bu ugurda alnyp barylýan işler jemgyýetiň ösüşiniň binýady bolup çykyş edýär.
Saglygy goraýyş ulgamynda täze lukmançylyk tehnologiýalarynyň ornaşdyrylmagy, ylmyň soňky gazananlaryna esaslanýan bejeriş usullarynyň giňden ulanylmagy we hyzmatlaryň hiliniň ýokarlanmagy bu ulgamda gazanylýan üstünlikleriň aýdyň subutnamasydyr.
Türkmenistanda häzirki zaman sagaldyş, dikeldiş we keselleriň öňüni alyş merkezleriniň gurulmagy milli saglygy goraýyş ulgamynyň ösüş derejesiniň ýokarydygyny görkezýär. Ýokary hilli enjamlar bilen üpjün edilen hassahanalar, ylmy-kliniki merkezler hem-de şypahanalar halkymyza ýokary derejeli hyzmatlary hödürleýär. Bu bolsa halk bähbitli tutumlaryň üstünlikli durmuşa geçirilýändiginiň aýdyň netijesidir.
Il saglygyny goramak, sagdyn durmuş ýörelgelerini wagyz etmek we jemgyýetde sagdyn ýaşaýyş medeniýetini ösdürmek ugrunda döredilýän giň mümkinçilikler türkmen halkynyň Milli Lideri Gahryman Arkadagymyzyň hem-de hormatly Prezidentimiz Arkadagly Gahryman Serdarymyzyň öňdengörüjilikli syýasatynyň miwesidir.
Türkmenistan sagdyn jemgyýetiň binýadyny berkidýän, halkyň saglygyny döwlet baýlygy hökmünde gorap saklaýan ýurt hökmünde öňe barýar. Gahryman Arkadagymyzyň we Arkadagly Gahryman Serdarymyzyň janlary sag, ömürleri uzak bolsun, halkymyzyň bagtyýar geljegine gönükdirilen tutumly işleri elmydama rowaç alsyn!
Aly ALYÝEW
Halkara ynsanperwer ylymlary we ösüş
uniwersitetiniň talyby
