Berkarar döwletiň täze eýýamynyň Galkynyşy döwründe Türkmenistanyň medeniýet ulgamy täze ösüş tapgyryna gadam basdy. Arkadagly Gahryman Serdarymyzyň ýolbaşçylygynda durmuşa geçirilýän döwlet syýasaty netijesinde medeniýet we sungat jemgyýetiň ruhy binýady hökmünde has-da kämilleşdirilýär.
Döwlet derejesinde sungatyň dürli görnüşlerini dikeltmek, ösdürmek we dünýä ýaýmak ugrunda alnyp barylýan işler ýokary netijelere eýe bolýar. Halkara medeni gatnaşyklarynyň giňeldilmegi, festiwallaryň, sergileriň, konsertleriň we maslahatlaryň yzygiderli guralmagy türkmen medeniýetiniň dünýä derejesindäki ornuny berkidýär.
Türkmen halkynyň asyrlardan bäri dowam edip gelýän däp-dessurlary, halk döredijiligi we sungaty häzirki döwürde täze öwüşgin bilen ösdürilýär. Zehinli ýaşlar we ussat halypalar şöhratly taryhymyzy, eşretli zamanamyzy wasp edýän aýdym-sazlary, sahna eserlerini, tanslary we kinofilmleri döredýärler. Teleradiogepleşikler arkaly bu medeni gymmatlyklar giň tomaşaçy köpçüligine ýetirilýär.
Döwletimiz tarapyndan gurlup ulanylmaga berilýän döwrebap teatrlaryň, muzeýleriň, kitaphanalaryň, medeniýet öýleriniň we sungat mekdepleriniň açylmagy döredijilik bilen meşgullanýan ýaşlara giň mümkinçilikleri döredýär. Bu desgalarda geçirilýän bäsleşikler, döredijilik duşuşyklary we medeni çäreler ýaş zehinleriň ýüze çykmagyna we ösdürilmegine itergi berýär.
Medeniýet ulgamynda gazanylýan üstünlikler halkymyzyň ruhy dünýäsini baýlaşdyrýar. Döretmegi, aýdym aýtmagy, sahna çykmagy halaýan ýaşlaryň dilinde Gahryman Arkadagymyzyň we Arkadagly Gahryman Serdarymyzyň adyna aýdylýan alkyşly senalar aýdym bolup ýaňlanýar. Bu senalar halkymyzy nurana geljege alyp barýan syýasatyň halk tarapyndan goldanýandygynyň nyşanydyr.
Türkmen medeniýeti — halkymyzyň ruhy baýlygy, döwletimiziň abraýynyň beýany. Bu ugurda alnyp barylýan işler ýurdumyzyň medeni ösüşiniň täze sahypasyny ýazýar.
Aýmanjan ATAJANOWA
Halkara ynsanperwer ylymlary we ösüş
uniwersitetiniň talyby
