Berkarar döwletiň täze eýýamynyň Galkynyşy döwründe Garaşsyz, baky Bitarap Türkmenistan saglygy döwlet syýasatynyň ileri tutulýan ugruna öwürdi. Bedew bady bilen ösýän ýurdumyzda ynsan saglygynyň goralmagy, halkymyzyň eşretli we ruhubelent ýaşamagy üçin ähli şertler döredilýär. Her ýyl giňden bellenilýän Türkmenistanyň Saglygy goraýyş we derman senagaty işgärleriniň güni hem bu ugra berilýän aýratyn ähmiýetiň aýdyň subutnamasydyr.
«Saglyk» döwlet maksatnamasy saglygy goraýyş ulgamyny düýpli özgertmek, döwrebaplaşdyrmak we halkymyzyň saglygyny üpjün etmekde möhüm ýol görkeziji bolup çykyş edýär. Adam saglygy – başyň täji, ähli baýlyklardan ýokary durýan gymmatlyk. Halkymyz asyrlardan bäri «Saglyk – beglik», «Jan saglygy bolmasa, dünýäniň giňliginden ne peýda» diýen pähimler bilen saglygyň ähmiýetini belent tutup gelýär.
Döwletimiziň baş baýlygy bolan halkymyzyň saglygyny goramak, nesilleriň sagdyn ösüşini üpjün etmek, ýaşaýyş-durmuş derejesini ýokarlandyrmak maksady bilen Diýarymyzyň ähli künjeklerinde döwrebap saglygy goraýyş merkezleri gurulýar. Bu merkezler keselleri anyklamak, bejermek we öňüni almak üçin iň täze tehnologiýalar bilen enjamlaşdyrylan. Lukmançylyk işgärleri bolsa, ak ýürekden hyzmat edip, halkymyzyň saglygyny goramakda uly zähmet çekýärler.
Gahryman Arkadagymyzyň we Arkadagly Gahryman Serdarymyzyň paýhasly ýolbaşçylygynda saglygy goraýyş ulgamynda gazanylýan üstünlikler halkymyzyň bagtyýar geljegine hyzmat edýär. Lukman Arkadagymyzyň «Türkmenistanyň dermanlyk ösümlikleri» atly ylmy-ensiklopedik eserinde beýan edilýän dermanlyk ösümlikler, olaryň peýdaly aýratynlyklary we ulanylyş usullary saglygy goraýyş ulgamynyň ylmy binýadyny has-da berkidýär. Bu ösümliklerden taýýarlanan melhem çaýlar we dermanlar halkymyza giňden ýetirilýär.
Saglyk – ýaşaýşyň çeşmesi. Garaşsyz Diýarymyzda sagdyn jemgyýeti gurmak, halkymyzyň saglygyny goramak ugrunda alnyp barylýan işler hormatly Prezidentimiziň parasatly syýasatynyň miwesidir. Türkmen halkynyň milli Lideri Gahryman Arkadagymyzyň we Arkadagly Gahryman Serdarymyzyň janlary sag, ömürleri uzak bolsun! Il-ýurt bähbitli tutumlary elmydama rowaç alsyn!
Aýna GELDIÝEWA
Döwletmämmet Azady adyndaky Türkmen milli dünýä dilleri
institutynyň mugallymy
