Berkarar döwletiň täze eýýamynyň Galkynyşy döwründe hormatly Prezidentimiziň parasatly ýolbaşçylygynda ýurdumyzda ähli ulgamlary döwrebaplaşdyrmak, innowasion ösüşleri ornaşdyrmak boýunça giň gerimli işler durmuşa geçirilýär. Bu ösüşleriň merkezinde bolsa sanly tehnologiýalaryň giňden peýdalanylmagy durýar.
Sanly ulgamlaryň ornaşdyrylmagy diňe bir gündelik ýaşaýşy ýeňilleşdirmek bilen çäklenmän, döwlet dolandyryşy, ykdysadyýet, bilim, ylym we jemgyýetçilik gatnaşyklary üçin täze mümkinçilikleri döredýär. Elektron resminamalar dolanyşygy, elektron şahsyýetnamalar ulgamy, bäsleşige ukyply sanly ykdysadyýetiň we sazlaşykly işleýän elektron senagatynyň döredilmegi häzirki zaman jemgyýetiniň sanly ösüş bilen aýrylmaz baglanyşyklydygyny görkezýär.
XXI asyryň başyndan bäri maglumat-kommunikasiýa tehnologiýalarynyň çalt ösmegi dünýäniň ykdysady, medeni we durmuş ösüşinde täze sahypany açdy. Ykdysadyýetde sanly tehnologiýalaryň ornaşdyrylmagy önümçilikleriň awtomatlaşdyrylmagyna, elektron söwdanyň giňelmegine, maliýe ulgamynda täze hyzmatlaryň peýda bolmagyna ýol açýar. Blokçeýn tehnologiýalary we akylly şertnamalar halkara söwda gatnaşyklarynyň möhüm guralyna öwrülýär. Şeýle-de, elektron bank hyzmatlarynyň giňden elýeterli bolmagy raýatlaryň maliýe mümkinçiliklerini artdyrýar.
Bilim ulgamynda hem sanly ösüşler täze mümkinçilikleri döredýär. Uzak aralykdan okatmak, elektron kitaphanalar, onlaýn okuw kurslary we wirtual laboratoriyalar arkaly bilimiň elýeterliligi ýokarlanýar. Bu bolsa ýaşlaryň dünýä derejesindäki bilim çeşmelerinden peýdalanmagyna giň ýol açýar.
Sanly tehnologiýalaryň ösüşi jemgyýetiň ähli ugurlaryna täsir edýän möhüm şert bolup çykyş edýär. Ol ykdysadyýetiň, bilimiň, saglygy goraýşyň we döwlet dolandyryşynyň netijeliligini ýokarlandyrmak bilen, döwletiň durnukly ösüşine itergi berýär.
Netijede, sanly mümkinçiliklerden netijeli peýdalanmak jemgyýetiň ösüşine täze ýol açýar. Bu ugurda ylmy-barlaglaryň dowam etdirilmegi, halkara tejribäniň öwrenilmegi we degişli hukuk binýadynyň kämilleşdirilmegi häzirki döwrüň möhüm wezipeleriniň biri hökmünde öňe çykýar.
Ogulsona KULYÝEWA
Halkara ynsanperwer ylymlary we ösüş
uniwersitetiniň talyby
